بلوچستان نا ہند چمن ئٹی اَسہ بندغ ئس خودکشی کرے۔
خودکشی کروکا بندغ نا چاہنداری عبدالراؤف نا پِن ئٹ مسُنے۔ خودکشی نا سوب نیستی و تنگ دستی پاننگانے۔
حوالکار آ تا رد ئٹ خودکشی کروکا بندغ نا تعلقداری چمن ئٹی برجاء برانزی تیان ءِ ہرا کیہی تُو آن چمن ئٹی سرحدی ہِن و بر کن پاسپورٹ نا شرط تخنگ آن پد بند ءِ۔
پاسپورٹ شرط تخنگ آن پد ہزار آ بندغ آک معاشی حوالہ ئٹ زیمی مسُنو، ہراکان پد چمن ئٹی لغڑی ( محنت کش) اتحاد و لغڑی تاجر اتحاد کیہی تُو تیان برانز کننگ ءُ۔
ہنوکا تُو سرسوب مذاکرات آن پد باڈر کراسنگ کن پاسپورٹ شرط ئے ایسر کننگاسس، واہم برانز کمیٹی دوارہ تینا برانز ئے بناء کننگ نا پڑو ترِسہ دوبہ خلکُسس کہ پاکستان و اوغانستان نا نیامٹ چمن بارڈر آن شناختی کارڈ و تذکرہ نا بنیات آ ہن و بر نا حوالہ ئٹ اوفتیتون کروکا وعدہ نا احترام کننگتنے۔
حوالکار آتا پاننگ ءِ کہ دوارہ بارڈر بند مَننگ آن دائسکان اِرا بندغ خودکشی کرینو۔
