شال ئٹی دستی بمب تراک ئٹی پولیس کارندہ آک ٹپی مسر۔
شابیتی حوال تا رد ئٹ شال ئنا ہند گوالمنڈی چوک آن خُڑک دستی بمب جلہو ئٹی اِرا کارندہ ٹپی مسُر۔
کالخواہ تا رد ئٹ نا دُرست آ بندغ آک دستی بمب خَسانو و نرنگ ٹی سرسوب مسنو، تراک ئٹی اِرا پولیس کارندہ ٹپی مسنو۔
ٹپی مروکا تے ہسپتال آ درننگانے، پاکستانی لشکر جاگہ ئے گھیرہ ٹی ہلکنے و جلہو کار آتے پٹنگ بناء کرینے۔
کیچ ئنا بنجاہی شار تُربَت ئٹی سلاہ بند بندغ آک لشکری چوکی و سرویلنس کیمرہ تے جلہو ئٹی ٹک کرینو۔
حوالکار آ تا رد ئٹ شام ئنا نُہہ بجہ غا تُربَت ئٹی تعلیمی چوک آ ساڑی لشکری چوکی ئے سلاہ بند بندغ آک راکٹ جلہو تیٹ ٹک کرینو۔
اَسہ پین جلہو ئسیٹی ائیرپورٹ کسر آ خَلوک اِرا سرویلنس کیمرہ تیا جلہو کرسا اوفتے تباہ کننگانے۔
مُسٹمیکو جلہو ئٹی مکُران اسکاؤٹ ئے ٹک کننگانے۔ حوالکار آ تا رد ئٹ ہشت نیم بجہ غا آپسر ئٹی مکُران اسکاؤٹ ئنا کیمپ آ سلاہ بند بندغ آک اے ون گولہ تیان جلہو کرینو۔
خضدار نا ہند بازگیر ئٹی پَند آ گشت کروکا ایف سی کارندہ غا تیا دستی بمب جلہو کننگانے۔
تراک آن پد لشکری کارندہ آک سُمکاری کرینو، نسخان تا بارو ئٹ حوال رسینگتنے۔
