بیگواہ ڈاکٹر عبدالحی ئنا ایڑ پریس کانفرنس کرسا پارینے کہ کنا ایلم ڈاکٹر عبدالحئی ولد حاجی محمد اسلم، آواران بیدی نا جہی ئے 1 جون 2024 آ سیکورٹی فورسز آک ڈیوٹی نا وختا زوراکی ئٹ بیگواہ کرینو۔ کنا ایلم آواران ڈسٹرکٹ ہسپتال ٹی آپریشن تھیئٹر اسسٹنٹ اس۔ او اَسہ مخلص ءُ ڈاکٹر اسے، ہراکہ تینا ڈیوٹی ئے وغداری و ایمانداری ئٹ کرسا کرینے۔ اودے سیکیورٹی لشکر بیدس سوب آن یکم جون 2024 آ زوراکی ئٹ بیگواہ کرینے ہرا دائسکان بیگواہ ءِ۔
او پارے کہ کنا ایلم ڈاکٹر عبدالحی ئے برمتہ کننگ آن پد اَسہ وار ئس اُرا آ ہیسُر، اونا اُرا ئے پٹار، ریاستی ادارہ آتے اُراٹی کتاب آن بیدس ہچ رسینگتو۔ ہموخت سیکیورٹی فورسز آک اُرا نا بندغ آتے دڑکو تسُر کہ ڈاکٹر عبدالحئی نا زوراکی ئٹ بیگواہی نا بابت ئٹ خبر تتون گُڑا ڈاکٹر عبدالحئی ئے 25 جولائی اَسکان آجو کرور، ولے دائسکان سیکیورٹی لشکر اودے آجو کتنے، اونا زوراکی ئٹ بیگواہی ئے داسہ اِرا تُو دہ دے گدرینگانے۔
اونا پاننگ اس کہ کنا ایلم ڈاکٹر عبدالحی بلوچ نا تعلقداری اَسہ چپ و شریف ءُ اُرا ئسے آن ءِ، او ذاتی حوالہ ئٹ ہم اَسہ چپ ءُ تب ئنا و تینا کاریم تون کاریم تخوکو بندغ اسے، اونا زوراکی ئٹ بیگواہی آن ننا خاہوت بھاز اذیت ئٹی ءِ و نن دا ہم تِپنہ کے اودے اَرا ڈوہ ئٹی و انتئے زوراکی ئٹ بیگواہی نا گواچی کننگانے۔
او پارے کہ نن نُما (صحافی) توسط ئٹ سیکیورٹی لشکر آن ڈاکٹر عبدالحی ئے آجو کننگ نا خواست کینہ۔ کنا ایلم ڈاکٹر عبدالحئی ئے اگہ آجو کننگ متو تو، 16 اگست آ ایکس آ اونا آجوئی کن اَسہ کیمپین ئس چلیفنگو۔ کیمپین آن پد 20 اگست آ کوئٹہ ٹی بلوچستان یونیورسٹی آن ہلیس ریڈ زون اِسکان اَسہ برانزی ریلی ئس کشنگو۔
