یانزدہ اگست، انگریز نا کوزہ آن بلوچستان نا آجوئی نا رِدئٹ تینا درشان ئٹی بلوچ نیشنل موومنٹ نا جارکش پارینے کہ یانزدہ اگست تینا قول ئے پوسکن کننگ نا دے ءِ۔ ببو اینو بلوچستان نا آجوئی ئے ولدا ہلّنگ نا قول ئے پوسکن کین کہ ‘کنے بلوچ شہید آتا دتر نا سوغند ءِ کہ بلوچ آجوئی نا جہد ئے برجا تخوٹ و ہچو دہنو کاریم ئس کروفٹ ہراڑان آجوئی نا جہد ئے و بلوچ راجی مفاد آتے نسخان رسینگہ۔’
او پارے کہ یانزدہ اگست نوزدہ سد و چِھل و ہفت (1947) آ بلوچستان انگریز نا کوزہ آن مُچ وڑئٹ آجوئی نا پڑو کرے۔ بلوچ قیادت دا دے آ بروکا جمہوری بلوچستان کن گام ہفے و اسہ آجو ءُ راج ئسے نا دروشم ئٹ بلوچ راجی شون ئنا نشخہ ئے مونا ہیس۔
جارکش پارے کہ اگہ انگریز نا چم ئٹ بلوچ راج ئنا آجوئی ئے پُھلتورہ تو اینو بلوچستان تون اوار مچا خطہ ٹی امن مسکہ۔ فرنگی بلوچستان آ کوزہ کن پاکستان ئے کمک تس ولے داڑے رہینگوکا مخلوق نا بنیاتی حق آتیکن ہچو کڑد ئس سر تتو۔ دولت مشترکہ نا ادارہ اسہ بےسوب ءُ خیال اسے۔ انگریز نا بھلنی ٹی دا ادارہ تینا بنیاتی مکست آک جمہوریت، امن و بندغی حق آتا رکھ آن بھاز مُر ءِ۔
او پارے کہ بنگلہ دیش نا آجوئی و اینو نا پاکستان نا محکوم راج آتا خْوارنگا حالت پھاش کرینے کہ ہند ئے پِرغنگ نا گام بھاز بےسوب مسّنے۔
بی این ایم نا جارکش خواست کرے کہ "کامن ویلتھ” نا مکست آتیان برخلافی آ پاکستان نا اواری ئے چھٹفر۔ انگلستان ئے تینا تاریخی ردی ئے ہلوئی ءِ و بلوچ راجی آجوئی نا کمک ئے کروئی ءِ۔
او مُستی پارے کہ بلوچ راج ئے پاکستان ٹی آجوئی تون اوار بنداوی حق آتیان مُر کننگانے۔ بلوچ راج ئنا سیاسی راہشون و راج دوست سیاسی کاریم کروکا تے پاکستان خلسہ بلوچ راج ئکن امن ئٹ جہد کننگ نا کسر تے چھٹفے۔ بلوچ راج آجوئی نا جہد ئنا ہزار آ شہید آتا بیر ئے ہِچ وڑئٹ بشخوف۔ شہید آتا دتر نا بیر پاکستان آن تیبہ راجی آجوئی ءِ۔
جارکش پارے کہ یانزدہ اگست ننے یات شاغفک کہ راجی آجوئی آن ویتہ ننا بقا خطرہ ٹی ءِ و ننا زنک ایسری مننگ ئٹی ءِ۔ ننا زبانک، دود، ادب و راجی دود آتے پاکستانی ریاست نسخان ترسہ ننے راجی ٹیوار (پجار) آن پد بٹینے۔ راجی آجوئی نا جہد ئٹی ننا بقا ءِ۔
او بلوچ آجوئی نا جہد ئٹی سَلوک جہدکار آتے پارے کہ اینو راجی سیاسی کاریم کروکاک یکہ تینا جند ئنا کڑد ئنا ہم جاچ ئے ہلیر۔ راجی آجوئی نا جہد ئٹی اُلس نا اواری ئے ودفنگ کن ہر بلوچ اسکان راجی آجوئی نا کُلو ئے سرکیر و جْوانیکا اوفتا مخ تفی ئے کیر۔
