بلوچ یکجہتی کمیٹی نا کنڈ آن اڈ ہلوک بلوچ راجی مچی نا کاروان تربت آ سر مس ہراڑے بی وائے سی نا جلسہ شہید فدا چوک آ مس۔
بی وائے سی نا سروک آک تران کرسا پاریر کہ نن تینا جہد و تحریک آن پدی مروفن۔
دا وختا جلسہ ٹی ہزار آتا کچ ئٹ نرینہ و نیاڑی و چُناک اوار اسر۔ کیچ ٹاور تون اوار ہیب ءَ کھیب ئنا ماڑی تیا بھلو کچ ئسیٹی بندغ آک ساڑی اسر۔ جلسہ ٹی ڈاکٹر ماہ رنگ،سمی دین، صبغت اللہ شاہ جی، ڈاکٹر صبیحہ تون اوار ایلو سروک آک اسر۔
ڈاکٹر ماہ رنگ بلوچ دا وختا جلسہ ٹی تران کرسا پارے کہ بلوچ نا جیرت و دلیری غٹ چم بازی تے بےسوب کرے و گوادر راجی مچی بلوچ تحریک ئٹی اسہ پوسکنو سبخ ئسے نا ودکی ئے کرے۔
او پارے کہ تلار ئٹ بلوچ راج استقامت نا پوسکنو مثیل ئس جوڑ کرے و کوہ سلیمان آن سیستان بلوچستان اسکان بلوچ راج “بلوچ راجی مچی” نا توار آ لبیک پارے۔ سم کاری و آنسو گیس نا شیلنگ کننگا ولے بلوچ گھام تے پدی کتو و دا بلوچ نا سرسوبی و روشن مستقبل نا مِستائی ءِ و دا جہد غلامی نا زمزیر آتے پرغنگ ئٹی سرسوب مرو۔
اونا پاننگ اس کہ بلوچ یکجہتی کمیٹی بلوچ نا توار ءِ، راجی تشکیل نا کنڈ آ اسہ زہم تخوکو گھام اسے و بلوچ ئے کلہو ایتک کہ بلوچ یکجہتی کمیٹی راجی تحریک اسے، بلوچ آن زند کننگ نا حق پُھلنگ مسنے، دا تحریک بروکا نسل نا روشن مستقبل نا تحریک ءِ و بلوچ تینا جہد و تحریک آن پدی مروف۔ کیچ ئنا سرزمین مہر و مابت نا سرزمین ءِ شہید آتا سرزمین ءِ۔
صبغت اللہ شاہ جی پارے کہ 27 جولائی آن ظلم وجبر نا چرجوئی بناء کننگا و مُسہ سنگت شہید کننگا کیہیک ٹپی مسر، بالاچ نا بیدس عدالت خون آن پد بناء مروکا تحریک اینو اسہ منظم تحریک ئسے نا دروشم ئے ہلکنے۔
سمی دین بلوچ پارے کہ 8 تُو مُست اندا شہید فدا چوک آ اسہ جون ئس داڑے تخوک اس۔ ننے مدام جون تننگانے ولے ہر جون آن پد اسہ پوسکنو انقلاب ئس ودی مسنے ننے فخر ءِ کہ ننا تعلقداری اسہ اندنو راج ئسے آن ءِ ہرا قربانی تیان خُلیپک، کُل چم بازیک بے سوب مسنو و بلوچ نا جہد اسہ تاغت تخوکو دروشم ئسیٹ مونا ہِننگ ءِ و ننا جہد اسہ پرایمن جہد اسے ولے ریاست ساندہ ننا جہد ئنا مونا توفنک دو ٹی سلوک ءِ۔
او پارے کہ اسلام آباد ئٹی ہم اندن کننگا و گوادر ئٹی ہم تاغت کارمز کننگا بلوچ اسہ اشتماعی مارشت و اشتماعی جہد ئسے نا کنڈ آ گھام خلنگ ءِ۔ گوادر ئٹ انت کننگا، نیٹ ورک و انٹرنیٹ بند کننگا و بازار تے بند کننگا، دیر بند کننگا و مخلوق ئے اشتماعی سزا تننگا۔ اسہ ریاستی دلال ئس گوادر مچی ٹی ننے آ جلہو کن بس و گوادر مچی ثابت کرے کہ بلوچ نا جہد ئنا کسر توننگ مروف۔
اونا پاننگ اس کہ سیوت و منظم مرسا ہی دا تحریک ئے سرسوب کننگ کینہ و بلوچ راجی شناخت و تشخص ئے ایسر کننگ کن جتا چم بازیک کارمرز مننگ ءُ ولے بلوچ تینا راجی شناخت و تشخص آن دو کشوف و درو ننا لمّہ باوہ غاک اندا کسر تیا تولِسہ برانز کریرہ اینو نن کینہ و دا جہد سلوف۔
