بلوچ یکجہتی کمیٹی نا راہشون بیبرگ بلوچ سوشل میڈیا آ تینا شنگ کروک ویڈیو کلہو ئسیٹی پارینے کہ اینو شام ئنا پنچ بجہ غا بی وائے سی نا کنڈ آن شال ئٹی ڈگری کالج آن بلوچستان یونیورسٹی اسکان ریلی ئس کشنگو۔
او پارے کہ بلوچ یکجہتی کمیٹی نا برانز ایسر متنے بلکن برجاء ءِ۔ دا وخت بلوچ راجی مچی نا بنجاہی برانز گْوادر، اوکان بیدس تُربَت، پَنجگُور، خاران، نوشکی، حب و شال ٹی برجاء ءِ۔
اگہ ریاست سوبر ءِگُڑا اودے سوبر مرسا گْوادر راجی مچی ٹی بی وائے سی نا بنجاہی قیادت تون تران کروئی مرو اگہ افک گُڑا برانز نا خواست آتا پورو مننگ اسکان برانز برجاء مرو۔
او پارے کہ اَسہ کنڈ آن ریاست مزاکرات نا ڈرامہ کننگ ءِ ایلو نیمہ آ ہنوکا دے دالبندین آن 49 نا کچ برانزی تے دزگیر کننگانے۔
او پارے کہ تران کن اوفتا سوبری نا دا عالم ءِ کہ ڈی جی آئی ایس پی آر بش مریک پریس کانفرنس کرسا بی وائے سی ئے دہشت گرد تنظیم ثابت کننگ نا کوشست کننگ ءِ۔
اوپارے کہ پرایمن برانز کننگ و تینا بندغ آ تا آجوئی کن برانز، ریلی، سینیمار و کانفرنس کننگ داکان مُست دہشت گردی نا لسٹ آن پیشن اسُر اگہ اوفتے اوار کننگک گُڑا ریاست شوق پورو کے ڈی جی ایس پی آر دانا ہم پڑو کے۔
بیبرگ بلوچ تینا ویڈیو کلہو ئٹی شال ئنا شاری تیان خواست کرینے کہ بی وائے سی نا نیمہ غان 7 اگست آ شام ئنا 5 بجہ غا شال ئٹی راجی مچی نا شہید آتے دروت ندر کننگ کن پر ایمن ریلی ڈگری کالج شال آن پیشتمو، ہرا جامعہ بلوچستان نا مون آ برجاء برانزی جاگہ آ سر مرسا ایسر مرو، ہراڑے بلوچ راجی مچی نا شہید آتے دروت ندر کننگ کن چراغ روشن کننگو۔
