بلوچ یکجہتی کمیٹی نا جارکش تینا شنگ کروک بیان ئٹی پارینے کہ ریاست پاکستان بلوچ راجی مچی نا برخلاف تاغت و بےدادی کاریم ئٹ ہتنگ آن گڈ بلوچ راجی مچی نا وختا دزگیر و زوراکی ئات بیگواہ کننگوک بندغ آتا خاہوت آتے بلوچ راجی مچی نا برخلاف پریس کانفرنس کننگ کن دڑکو تننگ ءِ۔
او پارے کہ ریاستی ڈھکوک ادارہ غاک و یاستی ڈیتھ اسکواڈ درو شال ئٹی سریاب، کلی اسماعیل و ہدا ٹی بلوچ راجی مُچی نا وختا دزگیر و زوراکی ئٹ بیگواہ کننگوک بندغ آتا خاہوت آتے دڑکو تننگ بناء کرینو۔ دا خاہوت آتے بیوس کننگ ءُ کہ او کانفرنس کرسا بلوچ یکجہتی کمیٹی و بلوچ راجی مُچی نا مذمت ئے کیر۔ ریاستی ادارہ غاک دا خاہوت آتے دڑکو تننگ ءُ کہ اگہ او تعاون کتور تو اوفتا بندغ آتے آجو کننگوف و اوفتے نسخان تننگو۔
جارکش پارے کہ خاہوت نا بندغ آتے دباؤ کن کارمرز کننگ نا دا زوراک حکمت عملی بندغی حق آتا سخت کتاڑ ءِ و دا پاش کیک کہ ریاست اختلاف رائے ئے چُپ کرفنگ کن ارا سیم اسکان ہِننگ کن تیار ءِ۔ نن ریاست پاکستان ئے پاش پانہ کہ دا چمبازیک بلوچ راج ئے چُپ کرفنگ کروفس، نن تینا پرایمن جہد ئے برجاء تخون۔
