گوادر ئٹی راجی مچی نا برانز نا پنچمیکو دے بلوچ یکجہتی کمیٹی نا راہشون ڈاکٹر ماہرنگ بلوچ تران کرسا پارے کہ 28 جولائی آ ریاست بلوچ راجی مچی ئے توننگ کن تینا تیوہ تاغت ئے کارمرز کرے، بندغ آتے شہید کرے، ٹپی کرے، دزگیر کرے، لٹ کُٹ کرے، آنسو گیس خسا، تیوہ بلوچستان نا کسر تے بند کرے، نیٹورک و انٹرنیٹ ئے بند کرے ولے دا کل آن بیدس ہزار آ بندغ آک راجی مچی ٹی بسر و اینو پنچمیکو دے ہم بندغ آک دا برانز ئٹی ساڑی ءُ۔
او پارے کہ دا ریاست ئے بلوچ آ تا مزاج و روایات آتا بابت ئٹ ہچ معلومداری افک، بلوچ آ تیٹی تاغت نا مون آ کاٹم شیف کننگ نا دود افک۔
ماہرنگ پارے کہ دا ریاست 28 جولائی آ بیرہ دے ٹکی بلوچستان نا بلوچ آتے اوار مننگ آن توننگ نا کوشست کرے، ولے بلوچ راجی مچی نا توار اینو دے کہی بلوچستان ئٹی ہم توار کننگ ءِ۔
او پارے کہ دے کہی بلوچستان نا بلوچ آک ہم اینو بلوچ راجی مچی نا دا جہد ئٹی اوار سلوک ءُ۔ ہندا بلوچ راجی مچی نا سر سوبی ءِ۔
