بلوچستان نا شہر گوادر ئٹی حکومت نا کریک ڈاؤن نا باوجود ہم مروکا ” بلوچ راجی مچی“ ٹی ہزار آ بندغ آک اوار مسُر۔ اَسہ پڑو ئسیٹی بیگواہ بلوچ سیاسی باسک آ تا آجوئی، لشکری آپریشن نا چُھٹفنگ و استحصالی منصوبہ آ تے توننگ نا مطالبہ کننگانے۔
بلوچ یکجہتی کمیٹی نا پاننگ ءِ کہ اگہ ننا مطالبہ تے مَننگ متو گُڑا برانز ملک ئنا اِیلو بشخ آ تیٹ ودیفینگ مرو۔ بلوچ راجی مچی نا موقع آ گوادر و ایب کھیب ئنا ہند آتیٹ کرفیو مسنے و شہر ئے چار کُنڈان سکیورٹی گھیرہ کرینے۔
راجی مچی ٹی اوار مننگ کن بلوچ یکجہتی کمیٹی نا راہشون ڈاکٹر ماہرنگ بلوچ و اِیلو راہشونک مُست گوادر آ سر مسوسُر۔
مچی تون خطاب کرسا ڈاکٹر ماہرنگ بلوچ پارے کے حکومت بلوچ راجی تحریک ئے ثبوثاژ کننگ کن اوچھا ہتھکنڈا آ تیا بسنے۔ او پین پارے کہ” برانز ننا آئینی حق ئسے۔ نن انصاف کن پیشتمانن و تینا حق ئے دوئی کرون۔”
ڈوئچ ویلے تینا رپورٹ کرسا نوشت کرے کہ ڈاکٹر ماہرنگ پارینے کہ بندغی حق آ تا خلاف ورزی نا سوب آن بندغ آک عدم تحفظ نا گواچی مسنو۔ ” اینو گوادر ئٹی دا بھلا مچی ثابت کرے کہ بلوچ تینا حق آ ہچ سمجھوتہ کروف۔“
اونا پین پاننگ اسک کہ حکومت گوادر ئٹی سکیورٹی خدشہ نا بہانہ کرسا بلوچ راجی مچی ئے بے سہب کننگ نا کوشست کرے ولے سر سہب مننگ کتو۔ ماہرنگ بلوچ پارے کہ ” بلوچ راجی تحریک ئے تاغت نا زور آ توننگ نا کوشست کننگ ءُ۔ داسہ وخت بسنے کہ ریاست ہوش کے و بلوچستان ئٹی جبر و بربریت ئے ایسر کے۔“
مقررین نا پاننگ اسک کہ بلوچستان ئٹی گواچنی بھلنی ئے نظر انداز کرسا لس مفاد نا برعکس من پسند غیر ملکی کمپنی تیتون اوار معاہدہ کننگ ءُ ہراڑا او چُپ مروفس۔ مقررین آک پین پاریر کہ ” حق اکن توار بُڑز کروکا بلوچ سیاسی باسک آ تے دزگیر کرسا بیگواہ کننگ ءُ ولے متاثر مروکا تے انصاف ملنگ اف۔“
گوادر ئٹی راجی مچی ٹی کاروان آ تا دروشم ئٹ ہزارا اِیلو بندغ آک اوار مننگ خواہیسُرا ولے اوفتے لشکر نا نیمہ غان جتاء کسر تیا زوراکی ئٹ توریر۔ اینو تیوعہ بلوچستان ئٹی کُل کسرک برانز نا سوب آن بند ءُ۔
