بیگواہ مروکا ڈاکٹر دین محمد بلوچ نا مسڑ و بندغی حق آ تا باسک سمی دین بلوچ پارے کہ بلوچ راجی مچی نا چاہنداری مہم ئٹی کراچی تون اوار تیوہ بلوچستان ئٹی بلوچ یکجہتی کمیٹی نا باسک آ تا برخلاف بے قانودی کاروائی وبندغ آتے جتاء وار ئٹ تنگ کننف نا لڑ برجاء ءِ۔
اونا پاننگ ءِ کہ کراچی آن چار بندغ شہداد بلوچ، صدام بلوچ، باسط بلوچ و عبدالرحمن بلوچ ہراکہ راجی مچی کن چندہ مُچ کروکا باسک آتے نوالین آن پولیس نا دزگیری ئٹی ہلنگ آن پد نا دُرست ءُ جاگہ سے آ دننگار ہرافتا بابت ئٹ دائسکان ہچ خبر رسینگتنے۔
سمی دین پارے کہ آواران آن 13 زالبول اِرا چُنکو چُنا تیتون اوار پولیس و ایجنسی دزگیر کننگ آن پد پولیس تھانہ آ دریر ہرانگا کس ءِ اوفتون اوڑدہی نا اجازت تننگ افس۔
او پارے کہ ریاست ننے دا سبخ تننگ ءِ کہ دا ریاست ئٹی پرامن برانز نا حق نن بلوچ آ تون افک؟ اگہ دہن ءِ گُڑا نن پڑو ترسہ پار، دننگا نزور آ چم بازی تیان نہ۔
سمی دین پین پارے کہ بلوچ راجی مچی نا چاننگ ای مہم ئٹی بلوچستان نا جتاء ہند آ تیٹ سرگرم باسک آ تا برخلاف ایف آئی آر نوشت کننگانے، ہراٹی واشک مستونگ قلات تون اوار حب چوکی نا ایف آئی آر ئٹ کنتون اوار کیہی بندغ آ تا پِن اوار ءِ، ہنوکا دے حب ساکران ئٹی پرامن مچی ئے جوز جوڑ کرِسہ دہشتگردی نا مقدمہ ریاستی بوکھلاہٹ نا عکاسی ءِ کیک۔
او پین پارے کہ بظاہر لگیک کہ بلوچ سیاسی باسک آ تے خوفزدہ کننگ کن بے بنیات مقدمہ قائم کننگ ءُ۔ مگر دا چم بازی تیان صاف ظاہر ءِ کہ دِیر، دیر آن خلینگ ءِ۔
