بلوچ یکجہتی کمیٹی نا بنجاہی راہشون صبغت اللہ شاہ جی، وسیم سفر، عبداللہ میر و ایلو باسک آک پسنی نا دورہ ئے کریر ہراڑے جیٹی پسنی ٹی ماہی گیر ویلفیئر سوسائٹی نا باسک آتون ملّار و بلوچستان ٹی مروکا ظلم و تادی خاص وڑٹ بلوچستان نا سمندر ئٹ غیرقانودی ٹرالنگ نا زیہا گپ ءُ تران مس۔ صبغت اللہ شاہ جی تران کرسہ پارے کہ اینو اگہ بلوچستان نا سمندر ٹی غیرقانودی وڑئٹ ٹرالنگ مننگ ئٹی تو دا ٹی ریاست نا دُو ارے ہرا ننا سمندر ئے نسخان تننگ ئٹی اے۔
صبغت اللہ شاہ ماہی گیر تہ بٹنگا کہ او بیست ءُ ہشت جولائی آ گوادر ٹی مروکا راجی مُچی ٹی بشخ ہلیر۔ بی وائی سی نا بنجاہی راہشون آک پسنی ویلفیئر کلب ئٹی بی این پی، نیشنل پارٹی، ازم آزمان، انجمن تاجران پسنی و لس مخلوق تون ملّار۔ او وخت آ نیشنل پارٹی نا خدا بخش سعید، اللہ بخش عثمان، بی این پی نا صدر شیخ احمد، ماہی گیر ویلفیئر سوسائٹی نا جنرل سیکریٹری ناخدا عنایت بلوچ، حق دو تحریک نا عزیز اسماعیل و ایلو بندغاک ساڑی اسّہ۔ او پاریر کہ ساڑی آ وخت ئٹی بلوچاک اسہ راج ئسے نا دروشم ئٹ اسٹ مریر، اینو بلوچ نا مال ءُ مڈّی، زندہ مننگ نا حق آتہ پُھلنگنگ ئٹی ءُ و سمندر نا مڈی تہ ٹرالنگ ئٹ دنّنگ ئٹی ءُ۔ اے وخت اسکا نن اوار مروفن بش مروفن اوتم اسکان ہندن بلوچ نا مال ءُ مڈی تا لُٹ ءَ پُل مرو۔
او پسنی نا سیاسی تنظیم و اُلس آن خواست کریر کہ بیست ءُ ہشت جولائی آ ‘بلوچ راجی مُچی’ ٹی گیشتر بشخ ہلیر۔
