تُربَت ئٹی زوراکی ئٹ بیگواہ کننگوک بندغ آ تا خاہوت آتا برانزی گدان ئے ہفت دے پورو مس، خاہوت آک بین برانز بناء کریر، زالبول ئسے نا تب خراب مس۔
ضلع کیچ ئنا جتاء ہند آ تیان تعلقداری تخوکا بیگواہ مروکا بندغ آ تا خاہوت آتا کیمپ ئے ہفت دے پورو مس، خاہوت آ تا کیمپ ضلعی انتظامیہ کیچ ئنا دفتر نا مونا برجاء ءِ، ہراڑان ضلعی انتظامیہ نا دفتر تون اوار کمشنر مکُران، محکمہ خزانہ و ضلع چیئرمین کیچ ئنا دفترہم ہنوکا ہفتہ آن بند ءِ۔
خاہوت آک کیمپ ئے ہفتہ ئس پورو مننگ آن پد بین برانز بناء کریر، خاہوت آ تا پاننگ ءِ کہ ننا بندغ آتے آجو کننگتو گُڑا نن بیوس مرسا برانز ئنا کُل آپشن آ تیا عمل کرون۔
بیگواہ مروکا تا خاہوت آتا ٹیم ئٹی بلیدہ آن بیگواہ مروکا جان محمد نا لُمہ بی بی شرخاتون نا تب خراب مس و او تُسینگا ہرانگا اودے جانجوڑی کمک تسُر۔
کیمپ ئٹی زالبول و چُنا تا بھلو کچ ئس اوار ءِ ہرا ضلع کیچ نا جتاء جتاء ہند آ تیان تعلقداری تخیرہ۔
کیمپ ئٹی بی ایس او پجار،حق دو تحریک و اِیلو سیاسی و چاگڑدی تنظیم آ تا سروک آک ہم اوار مرِسہ اواری نا درشانی کریر۔
