خاران آن بیگواہ کننگوک مختیار احمد مینگل نا موٹر سائیکل خاران نا ہند چنال و گروک نا یام ئٹ پولیس نا ہورکو چوکی سے آن خننگانے۔
عکس ئٹی خننگک کہ بیگواہ مروک نا خیسن رنگ ئنا موٹر سائیکل کچّھی تون اوار اسہ ہورکو کوٹھی سیٹ سلفوکے۔ پاننگک کہ دا کوٹھی ٹی پولیس نا کارندہ آک رہینگانُہ ولے منَہ وخت آن دا چوکی ئے بند کننگانے۔
نمے سما اے کہ سراوان خاران نا رہینگوک مختیار احمد مینگل باوہ نا پن حاجی عبدالحمید مینگل ئے پاکستانی فوج و اونا کارندہ آک درو بھتہ کن بیگواہ کریسُہ۔
جہی آ حوال آتا رِدئٹ خاران آن ہخس کہ موٹرسائیکل دزّنگرہ، پولیس تھانہ ٹی ایف آئی آر آن گُڈ ہم ہلّنگپسہ، دزّی آ موٹرسائیکل آتہ پنجگور، نوشکی، دالبندین یا واشک آ دیرہ، داڑے دا سوج بش مریک کہ دزّاک اَرا کسر تان کارہ؟ انت پولیس و لیویز ئے دا کسر تا خبر اف؟
حوال آتا رِدئٹ پولیس و لیویز نا چوکی تان ہمو بندغاک آسانی ئٹ و ویتہ ہرّفنگ آن کارہ ہرافتون ایم آئی یا آئی ایس آئی نا کارڈ مریک یا ایجنسی تا کمک ئٹ گدرینگرہ۔
