شال سریاب روڈ آ ظہیر احمد نا بیگواہی نا برخلاف پولیس مخلوق آ سُم کاری کرے، و خڑینکی گیس خلک۔ ہندن بندغ ہلک و درے۔
بلوچ یکجہتی کمیٹی نا راہشون ڈاکٹر ماہ رنگ بلوچ پارینے کہ ظہیر بلوچ نا آجوئی کن ہنوکا یانزدہ دے آن اونا خاہوت شال سریاب روڈ آ دھرنا تننگ ئٹی اے۔ اینو ریلی ئس کشّنگا ولے شال پولیس چُھنا و نیاڑی تہ لٹھ کُٹ کرے و امن ئٹ مظاہرہ کروکاتان ہلک درے۔
ماہ رنگ بلوچ پارے کہ دا ریاست ہر گِڑا ئے زوراکی ئٹ چلّفنگ خواہیک۔ اول تینا قانود نا برخلافی کرسہ مخلوق ئے زور ئٹ بیگواہ کیک ہرافتیک اوفتا خاہوت آک قانودی و امن نا وڑئٹ برانز کیرہ ولے ریاست ہیت ئے بِننگ نا جہہ آ چُھنا نیاڑی تہ لٹھ کُٹ کیک و ہلیک دیک تا۔
او پارے کہ اگہ دا ریاست ہندا سرپند مریک کہ زوراکی ئٹ مخلوق نا توار ئے شیف کروٹ تو او تاریخ ئٹی بھلو ردو جاگہ سے آ سلوکے۔ ای بلوچ راج و غُٹ بندغاتان خواست کیوہ کہ او ظہیر بلوچ نا خاہوت و لس مظاہرہ کروکاتا دا زوراکی و ہلّنگ دنّنگ نا برخلاف توار ہفّر و اوفتون اوار سلِر۔
