بلوچ راجی زْرمبشت نا بنجاہی جارکش ڈاکٹر محمد علی بلوچ نا دنیا ئے الّینگ آ افسوس کرسہ پارینے کہ تنظیم و راجی جہد ئکن اونا کڑد و راج دوستی ئے سلام کینہ۔ ڈاکٹر محمد علی تینا چُپی ئٹ بلوچ راجی آجوئی کن کاریم کرسہ نشان تس کہ تینے نشان تننگ آن ویتہ ہم راجی جہد ئٹی کاریم کننگ مریک۔
جارکش پارے کہ شاپک تربت نا رہینگوک ڈاکٹر محمد علی بلوچ راج دوست، آجوئی دوست و مخلص ءُ بندغ ئس اس۔ او نہ بیرہ راجی آجوئی آ یقین تخاکہ بلکہ تینا خاہوت و علاقہ نا مخلوق ئے جہد ئٹی اوار مننگ نا درس تسّکہ۔ ہندا سوَب آن اونا خاہوت نا بھازا ورناک جہد ئٹی بشخ ہلکُہ۔ اونا خاہوت آن شہید زبیر جان، شہید عامر جان، شہید فدائی جمال، شہید شاہ میر، شہید دولت و شہید ایوب بلوچ راجی آجوئی نا جہد ئٹی شہید مسّہ۔
او پارے کہ ڈاکٹر محمد علی بلوچ، بلوچ ئسے نا وڑ تینا زند ئے تدیفے۔ میڈیکل خواننگ تون اوار سروس کمیشن آ پولیس افسر نا امتحان ئے پاس کرسہ ڈی ایس پی رہینگا۔ ڈی ایس پی رہینگسہ ہم او وخت نا پاکستانی وزیراعظم یوسف رضا گیلانی نا گوادر آ بنّنگ نا دیوان ئٹی بشخ ہلتو، دا ہمت اونا راج دوستی و راجی فکر ئے پھاش کیک، ہرانا سوَب اودے نوکری آن کشّنگا، اودے پاننگا کہ وزیر ئسے آن سفارش کے ولدا عہدہ آ برے ولے او امنّا کتّو ۔
جارکش پارے کہ ڈاکٹر محمد علی بلوچ اسہ فکری و چائندار ءُ بندغ ئس اس۔ او “چاوش بلوچ” نا پِن ئٹ اِرا کتاب “پارلیمانی سیاست اور بلوچ جہد آزادی” و “بلوچ جہد آزادی، کامیابیاں اور نئی حکمت عملیاں” نوشتہ کرے، ہرا اونا زانت و سوگو آ ارادہ ئے پھاش کیرہ۔ دافتان سوا پین بھاز نوشت پین پِن ئٹ لکھانے۔
ڈاکٹر محمد علی بلوچ بھلو دولت نا بےافّی ٹی ہم راجی تنظیم آتہ کمک کریکہ و تینا خواری نا کمّائی آن بلوچ شہیداتا خاہوت آتہ مدَت تسّکہ۔
بی این ایم ڈاکٹر محمد علی بلوچ نا جہد و کڑد ئے منسہ اونا دنیا ئے الّینگ آ اونا خاہوت نا غم ئٹی اوار اے۔ نن اونا قربانی تہ اسُل گیرام کروفن و اونا یات ننا اُست ئٹی مدام زندہ سَلو۔
