بی ایل ایف نا جارکش میجر گہرام بلوچ میڈیا شنگ مروکو درشان ئسیٹی پارے کہ سرمچار آک 22 جون 2024 آ کیچ ئنا ہند ھوشاپ ئٹی پاکستانی لشکر نا شیف ئنا فورس لیویز چوکی آ جلہو کرسا سلاہ و ایلو گڑاتے ہرفیر۔
دا کاروائی 22 جون ئنا سُہب ئنا چار ءُ نیم بجہ آ کننگا، سرمچار آک لیویز کارندہ تے دزگیر کریر و اوفتا سلاہ آتے ہرفیر۔ ہرفوکا گڑاتیٹی ہشت اے کے 47، پنچ جی 3، اے کے 47 نا پازدہ میگزین، جی 3 نا دوازدہ میگزین، ہشت چاقو،یازدہ جاٹہ تُدءُ۔
ہندا چوکی نا کارندہ آک فوج ئنا اواری ئٹ لس مخلوق و ایلو چنکا کاروباری بندغ آتیان بھتہ ہلنگ تون اوار بلوچ اُلس ئنا تذلیل ئٹی اوار مسونو۔ دا چوکی قوضہ گیر لشکر نا اڈ کروکا ڈیتھ اسکواڈ نا کارندہ آتا ٹھکانہ نا حساب ئٹ ہم کارمرز مننگ اسک۔ وار وار پاننگ آن بیدس ہم دا کاریم تیان مُر متور۔ سرمچار آک لیویز کارندہ تے ہندی بندغ مننگ آ تنبیہہ کننگ آن پد یلا کریر۔
جارکش ایسر ئٹ پارے کہ لیویز فورس و پولیس کارندہ تے پاننگ خواہینہ کہ قوضہ گیر پاکستانی لشکر نا سہولت کاری آن مُر مریر و اوفتا امرو ہم کاریم ئسیان اُلس ئے تکلیف مس گڑا اوفتون دشمن نا وڑءُ سلوک کننگ مرو۔
بلوچستان لبریشن فرنٹ دا جلہو نا ذمہ واری ئے ہرفک و قوضہ گیر پاکستانی لشکر نا سہولت کاری و بلوچ اُلس آ زوراکی ٹی اوار کارندہ آک ننا نشانہ ٹی مرور۔
