بلوچ راجی زْرمبشت نا جارکش پارینے کہ بیست ءُ ہشت جون اِرا ہزار نُہہ ئنا دے بلوچستان نا تاریخ نا مونو دے ئسے، ہراتم ننا بنجاہی راہشون ڈاکٹر دین محمد بلوچ ئے پاکستانی فوج ہلک و بیگواہ کرے۔ اینو پانزدہ سال گدرینگ آن پد ہم پاکستانی ریاست و فوج ئٹی داخس ہمت اف کہ او ڈاکٹر دین محمد بلوچ ئے تینا عدالت ئسیٹ ہتیر پھاش کیر۔ دا دے ننے نہ بیرہ ڈاکٹر دین محمد بلوچ یات آ بریک بلکہ بلوچستان ٹی برجا زور ئٹ بیگواہی تا داستان ہم بِننگ مریک۔
جارکش پارے کہ ڈاکٹر دین محمد بلوچ نا زور ئٹ بیگواہی نہ بیرہ اونا خاہوت بلکہ بلوچ چاگڑد آ اثر شاغانے۔ اونا چُنکا مسِنک برانزی کیمپ، عدالت و پِن ئنا کمیشن آتیٹ بھلُن مسّہ، ڈاکٹر دین محمد بلوچ نا خاہوت دڑد و غم ئنا پھاشو درشانی سے۔
او پارے کہ ڈاکٹر دین محمد بلوچ نا زور ئٹ بیگواہی گَل و خاہوت کن بھلو نسخان ئسے، دا ہندنو دڑد ئسے ہرا لوزاتیٹ پھاش مننگ کپک، ولے اونا بھادر و چائندارا مسڑ چُناک تینا باوہ نا بیگواہی نا توار ئے ہفّسہ پاکستانی ریاست نا دُو آن بیگواہ مروکا غُٹ بندغاتا توار جوڑ مسّہ۔ اینو سمی دین بلوچ بیرہ بلوچستان نہ بلکہ مُچ جہان ئٹی بندغی حق آتا توار آ درست مریک، اونا جہد پھاش کیک کہ دشمن نا تِروکا دڑد آن اَرا وڑ ئٹ سوگو مرسہ وخت ئنا فرعون آتون جنگ کننگک۔
بیست ءُ ہشت جون آ نن ہندا دے ئنا رِدئٹ سوشل میڈیا آ
ReleaseDrDeenMohammad#
StopEnforcedDisappearances#
نا ہیش ٹیگ آتا مہم ئس چلّفون۔ تنظیم، بندغی حق آتا ادارہ و بندغ دوست آ مخلوق آن خواست اے کہ دا مہم ئٹی زْیات بشخ ہلیر و ڈاکٹر دین محمد بلوچ نا آجوئی نا توار مریر۔
