بلوچ راجی زْرمبشت (بی این ایم) نا کماش ڈاکٹر نسیم بلوچ نواب خیربخش مری نا دہ میکو وفات نا سال ئنا رِدئٹ تینا درشان ئٹی پارینے کہ نواب مری بلوچ آجوئی تحریک نا کماشاتیٹ راہشون و استاد ئس اس۔ اونا مچ زند جہد، قربانی و سوگوی نا عکس ئسے۔ اونا وفات نا دے آ سیاسی چائنداری، فکری سوگوی و بھلو تُغ ئسے نا تعمیر کن اونا جہد ئے دروت ندر کینہ۔
ڈاکٹر نسیم بلوچ پارے کہ نواب خیربخش مری غُٹ زند ئے اسہ فکر و فلسفہ سیٹ تدیفے، اونا زند بلوچستان نا آجوئی، اختیار و بقا نا جہد ئتو تفوک اس۔ او بھازا مسئلہ آتا مون سلیس۔ دنیا دو قطبی آن یک قطبی مسک، نظریاتی سیاست اوار سوار مس، فکر ئے الّینگ فیشن ئس جوڑ مس ولے بلوچ راہشون تینے سوگوی ئٹ تورے۔ خطہ ٹی سیاست و بلوچستان نا حالت آتا شیف ءَ بُڑزی، خُڑک ئنا سنگتاتا نسخان تروکا سیاست ہُسونی ئس تو اس ولے اونا تلار آن بارنگا سوگوا فکر شیف تمتو و او کمان ئے پوسکنا پیڑی ئے تس جند تَہ جنگ ئنا پڑ آن شہسوار ئسے آن با جہان آن رخصت کرے۔
او پارے کہ بلوچستان نا آجوئی نا تحریک ئٹی نواب خیربخش مری نا کڑد بھاز تالان اے، او نہ بیرہ سیاسی پِڑ آ بلکہ فکری سنگر آ ہم سلوک اس۔ او تینا جہد ئٹی بھاز وار زندان ئٹی بند کننگا، وطن آن کشنگا و تینا مار بالاچ مری نا شہیدی نا دڑد ئے ہم سہا۔ دا غُٹ آن پد ہم او تینا کسر ئے الیتو، او نہ بیرہ بلوچ بلکہ مچا دنیا نا محکوم آتیک مثال ئس اس۔
ڈاکٹر نسیم بلوچ پارے کہ نواب خیربخش مری نا کڑد بلوچ ورنا تا بھاز اثر تخک۔ او ورناتے کن کسر نا چراغ ئسے، ہرافتے او ہیل تس کہ پجار، زبان و دود نا رکھ بیرہ وطن نا آجوئی و آجوئی نا جہد ئٹی تخوک اے۔ اونا فکر اینو ہم بلوچ ورناتیک کسر نا چراغ اے و اونا جہد صدی تے اسکان ننے حوصلہ و سوگوی ترسہ کرو۔
بی این ایم نا کماش ڈاکٹر نسیم بلوچ پارے کہ سیاسی پِڑ آ نواب خیربخش مری نا جہد بلوچ ورناتے اسہ پوسکنو حوصلہ و کُنڈ ئس نشان تس ، او مدام پِن ئنا مزاکرات و گپ و تْران نا جہا فکری کسر ئس گچین کرے و اوڑکن ہر وڑ ئنا قربانی تس۔ اونا دا سوگوی اودے ایلوفتیان جتا کیک ۔ اونا سیاسی کڑد بلوچ آجوئی نا جہد ئے اسہ پوسکنو جوزہ ئس بشخا و اینو ہم اونا فکر نن کن کسر نا چراغ اے۔
ڈاکٹر نسیم بلوچ ایسر ٹی پارے کہ اینو اونا وفات نا دے اے، نن اونا جہد ئے مون آ دننگ نا قول کینہ۔ نواب خیربخش مری نا زند ئنا ہر ساعت ننے دا ہیل تیک کہ فکر ئسے آ سلسہ نن تینا مزل ئے سرمننگ کینہ۔ ننے اونا قربانی تے یات تخسہ بلوچستان کن جہد ئے برجا تخوئی تمو و داڑکن ہر وڑ ئنا قربانی تننگ کن بیدار مروئی تمّو۔ اینو نا دے ننے آ پھاش کیک کہ حق ئکن مروکا جہد مفت ہنپک، اونا زند ننے پائک کہ فکر آ سلنگ و سختی سوری تون مون تننگ ئٹ سرسوبی نا ڈس ملّیک۔ ننے اونا پدرند مرسہ بلوچستان نا اسٹی، آسودئی و آجوئی کن داکان زیات جہد ئنا کُنڈا بروئی مرو و سوگوی ئٹ کاریم کروئی تمّو۔
