ملیر ایکسپریس وے نا جوڑنگ نا کاریم تیزی ئٹ برجاء ءِ، سی و نُہہ کلیومیٹر مرغن کسر نا مشینری قائد آباد پُہل ملیر ئے سرمسنے۔
ملیر ایکسپریس وے نا کُنڈانخلوکا نشان تیٹ غلام محمد بلوچ گوٹھ نا نیمہ بشخ ئنا اُرا و دُکانک بٹِنگور۔ ہندی حوال تا رِدٹ قائد آباد پہل ملیر نا ودّفنگ نا کاریم ہم بناء مسّنے، ہراڑے قائد آباد پُہل ملیر نا ایلو نیمہ آ ملیر نا غُٹ آن بھلا کتابجاہ "سید ہاشمی ریفرنس کتابجاہ” نا دیوال آتے نشان خلّنگانے۔
نشان آتا عکس و ویڈیو تا تالان مننگ آن پد کراچی نا علمی و ادبی پلک آک داڑا افسوس کریر ولے سما تمتو کہ نشان اَرا ادارہ خَلکنے۔
سید ہاشمی ریفرنس کتابجاہ انتظامی کمیٹی نا کماش اکبر ولی حوال کننگ آ پارے کہ نن ملیر آن بش مروکا نمائندہ آتون حوال کرین ولے کس ئے سما اف کہ کتاب جاہ ئے اَرا ڈٹ آن نسخان ریسنگک۔
او پاریر کہ بلوچی زبان نا پِنی آ زبان دان، ناول نوشتہ کروک و شاعر سید ظہور شاہ ہاشمی نا پِن آ دا کتاب جاہ نا بنیات ئے اِرا ہزار سئے ئٹی لال بخش رند تخا۔
کتابجاہ ٹی چھانڑدہ ہزار آن گیشتر کتاب ارے، نن کتابجاہ نا کُنڈان داسکان چِھل آن زْیات کتاب شِنگ کرینن، بھازا ورناک داڑے کتاب خْوانیرہ۔
اکبر ولی پارے کہ ملیر نا مخلوق کتابجاہ ئے بِٹِنگ الّوف، کراچی نا علمی و ادبی پلک آک ہم سید ہاشمی ریفرنس کتابجاہ نا بِٹِنگ نا حوال آ افسوس کریر۔
چاگڑدی کاریم کروک حفیظ بلوچ، ڈاکٹر پروفیسر رمضان بامری، نوشتہ کار عزیز سنگھور، واحد کامریڈ، عظیم دہکان، عمران ایڈوکیٹ، صحافی بشیر بلوچ، ریاض بلوچ و ایلوفک پاریر کہ سندھ سرکار نا نیمہ آن ملیر ئٹی ہچّو کتابجاہ ئس اف۔ سید ہاشمی ریفرنس کتابجاہ مخلوق نا چندہ آن جوڑوکے، دادے اسہ کسر ئسے نا خاطر آن بٹنگ افسوس نا ہیت ئسے۔ او پاریر کہ کتابجاہ ٹی بلوچی ادب نا مڈّی ئس تخوکے، حکومت و انتظامیہ ئے دانا احساس اف، ہر وڑ ئنا منصوبہ ئسیٹ کتابجاہ ئے بٹنگ ارمان نا گپ ئسے۔ حکومت علمی ادارہ تفنگ نا جہا مہالو نا ادارہ آتے بٹسہ ملیر نا مخلوق ئے بےخوانندئی ٹی تخنگ خْواہیک۔
