بلوچ مخلوق ئے خلّنگ ، زور ئٹ بیگواہی و ہِنوکا دے مشکے آن اسہ بلوچ نیاڑی سے نا زور ئٹ بیگواہی نا برخلاف گْوادر ٹی برانز ئس کننگا۔
دا برانز درو سی ءُ یک مئی آ بلوچ یکجہتی کمیٹی نا نیمہ آن گْوادر پریس کلب نا مون آ مس۔
برانز ئٹی پاکستانی فوج ئنا دُو آن سال آتان زور ئٹ بیگواہ عظیم دوست نا ایڑ رخسانہ دوست، بیگواہ آ نسیم بلوچ و رفیق بلوچ نا خاہوت مشکے آن بیگواہ مروکا بلوچ نیاڑی و تینا عزیز آتا زوت آجوئی نا خواست کرسہ پاریر کہ نن تینا بندغاتا بیگواہی آن بھلو دڑد ئسے نا گْواچی اُن۔
او پاریر کہ اگہ اوفک گِڑاس کرینُو گڑا ریاست نا ذمہ واری جوڑ مریک کہ اوفتے قانودی حوالہ ئٹ عدالت آ ہتے، اوفتے ڈھکنگ و خلّنگ بِٹنگ بند مرے۔
سیاسی و چاگڑدی کاریم کروک ماجد سہرابی و بی ایس او نا مُستنا کماش سعید فیض تْران کرسہ پاریر کہ ریاستی ادارہ آک بےسوب ءُ، او تینا بےسوبی ئے ڈھکنگ کن بےگناہ بندغاتے زور ئٹ بیگواہ کرسہ تورِرہ و سزا تیرہ اراڑان اوفتا خاہوت آک خوار مننگءُ۔
اوفک پاریر کہ ریاست اخس ظلم و تادی کرو زور ئٹ بیگواہی تہ برخلاف بی وائی سی نا جہد ہموخس سوگو مرو۔ اینو ہر بلوچ نا اُراٹی ریاست کن نفرت آن ویتہ ہِچس رہینگتنے۔ بی وائی سی بلوچ و بلوچستان نا برخلاف برجا انگا ہر ظلم و تادی آ توار بُڑز کرسا کرو۔
