بلوچستان نا ہند دکی ٹی سیل ئنا ہند مندے ٹک نا ہند آ پکنک نا وخت سُمکاری آن لیویز کارندہ شمس اللہ ولد نصراللہ کمال خیل ناصر خلنگا۔
ایس ایچ او جلیل احمد مری نا رد ئٹ خلنگوکا لیویز کارندہ پین مُسہ سنگت تون اوار پکنک کننگ کن مندے ٹک آ ہناسس۔
اونا سنگت آ تا رد ئٹ نن نماز خواننگ اسُن کہ سلاہ بند بندغ آک لیویز کارندہ آ سُمکاری کریر و نرار، ارانا سوب آن لیویز کارندہ ہموخت ساہ تس ۔
ڈاکٹر نا رد ئٹ خلنگوکائے خیر آن سُم ئس لگانے۔جون ئے سول اسپتال آ دریر اراڑے المی کاروائی آن پد جون ئے خاہوت نا دوٹی تسُر۔
پولیس و لیویز اواری ئٹ کاروائی کریسہ اونا سنگت نعمت اللہ کمال خیل ناصر و امین اللہ استرانہ ئے سول اسپتال دکی آن پٹ و پول کن دزگیر کریر، اوفتا ایلو سنگت نرا۔
ایلو نیمہ آ پَنجگُور نا ہند پنچی آن خُڑک بندغ ئسینا جون خننگا۔پولیس نا رد ئٹ تسپ پنچی کہن رخشاں ڈور آن کیہی دےمُتکنو جون ئس خننگا ارادے پجار کن ٹیچنگ اسپتال آ دریر ۔
