بلوچستان ٹی بندغی حق آتا توار و بلوچ یکجہتی کمیٹی نا راہشون ڈاکٹر ماہ رنگ بلوچ دا وخت آ یورپی ملک ناروے ٹی ءِ ہرا بندغی آتا حوالہ ئٹ اڈ تروکا دیوان ئٹی بشخ ہلّنگ کن ہنانے۔
ڈاکٹر ماہ رنگ بلوچ ناروے ٹی بندغی حق آتیک کاریم کروکاتون ملّنگ ئٹی ءِ و بلوچستان ٹی مروکا پاکستان نا ریاستی ظلم و تادی و زور ئٹ بیگواہی تا زیہا دنیا ئے چائنداری تننگ ئٹی ءِ۔
دا حوالہ ئٹ او ایران نا نوبل انعام کھٹّوک بندغی حق آتا توار نرگس محمدی ہرا دا وخت ایران ٹی بندی ءِ، نا چُناتون و خبرنویس ایلزبتھ ایڈی و ایلوفتون مِلّا۔
ڈاکٹر ماہ رنگ بلوچ سوشل میڈیا آ تینا درشان ئسے ٹی پارے کہ اِرا ہزار بیست ءُ سئے نا انعام کھٹوک بھادر و دلیر نرگس محمدی نا چُناتون ملّنگ شرف نا ہیت ئس اس۔
دا دیوان نا بھلُنی ئے ناروے نا نوبل پرائز کمیٹی نا کماش و Norsk PEN نا سیکریٹری جنرل Jorgen Watne Frydnes کرے۔
او پارے کہ ناروے نا خبرنویس و مہالو نا پروفیسر ایلزبتھ ایڈی تون ملّنگ ہم شرفداری سے۔
ڈاکٹر ماہ رنگ پارے کہ ایران و بلوچستان نا نیاڑی تے اسہ وڑ ئنا ویل آتون مون تروئی تمّک، نن اومیت کینہ کہ دا دیوان آتے برجا تخون و بروکا وخت ئٹی دا کمک ئے مُستی درون۔
یات مرے کہ ناروے ٹی دا دیوان پھگّا مرو ہرا مُسہ دے چلّو۔ دا دیوان ئٹی غُٹ دنیا آن بندغاک بشخ ہلور
