بلوچستان نا کسر آ وفاقی و بلوچستان نا ادارہ آتا ظلم و لسبیلہ و حب ئٹی ایرانی تیل ئنا کاروبار آ پابندی نا برخلاف ٹرانسپورٹ یونین اتحاد نا نیمہ آن درو حب دےکیہلینگ بائی پاس بھوانی آ برانزی ریلی ئس کشّنگا۔
ریلی ٹی بلوچستان نا بھازا ٹرانسپورٹ یونین، ڈریور، کلینڈر و ایرانی تیل ئنا کاروبار کروکا بندغاک بھلو کچ ئسیٹ بشخ ہلکُر۔ ریلی ٹی بروکاک بینر و کارڈ ہرفیسُر ارافتا سیم ئنا کاروبار و تیل ئنا سرمننگ نا خْواست آک نوشتہ اسُر۔
ریلی دےکیہلینگ بائی پاس بھوانی آن مرسہ لسبیلہ پریس کلب حب ئے سرمس اراڑے مخلوق برانزی مظاہرہ کرے و تینا خْواست آتیک نعرہ خلک۔
دا وخت آ آل ٹرانسپورٹ یونین اتحاد نا بھلاک محمد عالم شاہوانی، عبدالحمید شاہین عمرانی، سفر خان رخشانی، عبدالوحید لہڑی، عطااللہ، حبیب اللہ و ایلوفک تْران کرسہ پاریر کہ بلوچستان نا گاڈی والاتے بلوچستان نا روڈاتا بلوچستان و وفاقی ادارہ آتا چوکی تا نیمہ آن بےسوَب خْوار کننگک داسا اوفتا روزگار ئے پُھلنگ ئٹی ءُ بلوچستان نا گیشتر مخلوق ایرانی تیل ئنا کاروبار کیک ولے وفاقی و صوبائی چوکیک اوفتان بھلو بھتہ ئس ہلیرہ ایلو نیمہ آ اوفتا خلاف پیشتنگرہ دا اَرا انصافءِ۔
