تُربَت آن زوراکی ئٹ بیگواہی تہ گواچی مروکا ورنا تا خاوت آک انتظامیہ نا رویہ آن مایوس، برانز ئنا پڑو
بلوچستان نا ضلع کیچ ئنا ہند تُربَت نا ہندی بندغ آک تینا شنگ مروکو ویڈیو درشان ئسیٹی ہنوکا دے تیٹ تُربَت آن زوراکی ئٹ بیگواہی نا نشانہ جوڑ مروکا محمد صالح ولد طارق،امتیاز ولد اقبال،وسیم ولد حسن و اعجاز ولد امید نا وے آجو مننگ و انتظامیہ نا رویہ نا مذمت کریر۔
ہندا چار ورناتے ہندا تُو 17، 18 مئی نا نیامی شام ئٹی تُربَت نا ہند آبسر آن پاکستانی لشکر دزگیر کننگ آن پد تینتون اوار دریس ارا دائسکان ہم مونی ہتنگ متنو۔
خاوت نا رد ئٹ ہندا تُو پاکستانی لشکر اوفتا اُرا آ چھاپہ خلک و چار ورناتے دزگیر کننگ آن پد تینتو ن اوار درے ، تدینی نا برخلاف پریس کانفرنس کننگا، ولے وار وار نا تسلی آن پد ہم ہچ عملا کاروائی مننگ کتو۔
زوراکی ئٹ بیگواہی تا گواچی مروکا ورناتہ خاوت آتا رد ئٹ تدینی نا حوالہ ئٹ اوفتے وار وار انتظامیہ تسلی تس کہ اوفتا بندغ آک برور ولے دائسکان ورناک آجو مننگ کتوس۔
خاوت نا رد ئٹ پولیس پائک کہ زوراکی ئٹ بیگواہی تہ ایف آئی آر نوشتہ کننگ کپسہ ۔
خاوت نا پاننگءِ کہ اگہ پھگہ سی ٹی ڈی دروغ ئٹ دوبہ خلے گُڑا پولیس ننا بندغ آ تیکن الم ایف آئی آر نوشتہ کرو ۔
خاوت نا پاننگءِ کُل چار انگا ورناک زمباد لاری نا ڈرائیور ءُ ۔خاوت نا پاننگءِ ڈی سی آفس و مرکزی کسر آ برانز ریکارڈ کرون ۔
