انڈیا،ایران نا ساحلی شہر چابہار ئٹی ساڑی شہید بہشتی بندرگاہ ئے چلفنگ کن دہ سال نا معاہدہ کرین ارانا رد ئٹ دا بندرگاہ نا کنٹینر ٹرمینل ٹی سامان تہ دننگ ہتنگ ئے پُوسکنا وڑ ئٹ کرور ۔
ایران نا شہر تہران ئٹی شہری دیمرئی نا وزیر مہرداد بازار پاز و وانڈیا نا جہاز رانی نا وزیر سرباندا سونووال دا معاہدہ آ دستخط کرے ۔ایرانی میڈیا رپورٹس آتا رد ئٹ چابہار بندرگاہ ئے پُوسکُن جوڑ کننگ کن انڈیا ”سٹریٹجک آلات آتا تننگ ئٹی 120 ملین ڈالر تون اوار دا ٹرانسپورٹیشن انفراسٹرکچر کن 250 ملین ڈالر آن زیادہ سرمایہ کاری کرو۔“
ایران عراق جنگ ئنا وخت آبنائے ہرمز و خلیج فارس آن پیشن بندرگاہ نا بکار کن 1983 ٹی شہید بہشتی بندرگاہ چابہار نا اِرٹمیکو اہم انگا بندرگاہ نا دروشم ئٹ اڈ کننگاسس ۔
کیہی مبصرین آتا خیال ءِ کہ انڈیا پاکستان ٹی کراچی و گْوادر نا بندرگاہ تے بائی پاس کننگ کن ایران نا جنوب مشرقی ساحل آ چابہار بندرگاہ نا اَسہ بشخ ئس تیار کنگ ءِ و چابہار نا کار آ تجارتی سامان ایران ، وسطی ایشیائی ممالک و اوغانستان ئے برآمد کننگ ءِ۔
مہرادا بازارپاش نا رد ئٹ ہنوکا سال تہران ئٹی سہ فریقی اجلاس نا وخت انڈیا و روس ئے ایران کسر پروجیکٹ نا نقشہ پیش کننگا۔ او پارے کہ چابہار منصوبہ و ایران نا روڑ ریل نیٹ ورک نا زریعہ ، انڈیا چابہار آن اوغانستان و وسطی ایشیا، ترکی، آذربائیجان ، جارجیا و شام اسکان سر مننگ کیک ۔
