بلوچ راجی زْرمبشت (بی این ایم) نا جارکش تینا شنگ مروکا درشان ئٹی پارینے کہ تنظیم نا جرمنی ہنکین نا پنچمیکو جنرل باڈی اجلاس بیست نومبر اِرا ہزار بیست ءُ چھار آ ہینوور ئٹی اڈ تننگا اراٹی بی این ایم نا کماش ڈاکٹر نسیم بلوچ مہمان خاص ، بنجاہی دیوان نا باسک و بی این ایم نا بندغی حق آتا ادارہ پانک ئنا سروک حاتم بلوچ، بنجاہی دیوان نا باسک حاجی نصیر و ھمل بلوچ ہم مہمان خصوصی اوار مسُر۔
درشان ٹی پاننگا کہ دیوان نا بِنا بلوچ راجی سوت آن کننگا پدا بی این ایم جرمنی ہنکین نا مُسکوہی کماش اصغر بلوچ تینا کماشی نا گُڈیکو تْران ئے کرے اوڑان پد حاجی نصیر و حاتم بلوچ تْران کریر۔
بی این ایم جرمنی ہنکین نا سیکریٹری جنرل جبار بلوچ جنرل باڈی نا مونا سیکریٹری رپورٹ ئے تخا، اراٹی کابینہ نا کاریم، سوج، ورندی و نغدکاری نا گپ و تران مس۔
ارٹمیکو سیشن نا بِنا ئے ڈاکٹر نسیم بلوچ کرے، اراٹی او بلوچ راجی جہد آ پیشن نا و ہندی سیاست نا اثر آتا ہیت کرے۔ ڈاکٹر نسیم بلوچ پاکستانی لشکر نا دُو آن شہید مروکا شہید دوستا محمود و اونا خاہوت تون اوار اوار آزات بلوچستان کِن ساہ تِروکا غُٹ بلوچ شہیداتے دروت ندر کرے ۔
ڈاکٹر نسیم بلوچ نا تْران آن پد الیکشن کمیٹی نا باسک حاجی نصیر، حاتم بلوچ و ھمل بلوچ مُست ئنا کابینہ ئے جْوانی ئٹ چُھٹفیر و پوسکنا کابینہ کِن گچینکاری کننگا۔
بی این ایم جرمنی ہنکین نا پوسکنا ذمہ وارتیٹ شر حسن صدر، صفیہ منظور نائب صدر، جبار بلوچ جنرل سیکریٹری، شلی داد جوائنٹ سیکریٹری، و امجد بلوچ فنانس سیکریٹری گچین کننگار۔
پوسکنا صدر شر حسن تْران کرسہ پارے کہ بی این ایم جرمنی ہنکین اونا سیاسی مسخت ئے مونا دننگ کِن جہد کرو۔
بی این ایم جرمنی ہنکین نا مُست ئ
نا صدر اصغر علی کُل باسک آتے منت وار پارے و پوسکنا کابینہ ئے مبارکی تِس۔
دیوان نا ایسر ٹی کماش ڈاکٹر نسیم بلوچ پوسکنا کابینہ نا باسک آتے مبارکی تِس و اومیت کرسہ پارے کہ پوسکنا کابینہ بی این ایم جرمنی ہنکین نا بھلّا واجہ غفار بلوچ نا جہد ئے مُستی درو۔
