بلوچستان نا پِنی آ عکس کش کمانچر بلوچ مُرغنو ناجوڑی سے آن پد بیست ءُ پنچ سال ئنا عمر ئٹی جہان آن رخصت مس۔
سرور بلوچ کمانچر نا پِن آ چاننگاکَہ ارانا زیباغا عکس آک و ڈیہہ ئنا ویل آتا عکس آک پِنی اسُر۔ اینو کراچی نا اسپتال ئسیٹ جہان آن رخصت کرے۔
بلوچستان نا زیباغا ندارہ آتا تینا عکس کشی آن او مُچ بلوچستان ئٹی پِنی اس، اونا عکس آک نہ بیرہ علاقہ نا ندارہ و دود آتے پھاش کریر بلکہ سیاسی و چاگڑدی ویل آتے ہم پھاش کیرہ۔
کمانچر بلوچ ارا بیست ءُ پنچ نومبر، نوزدہ سد ءُ نوَد ءُ ہشت ئٹی کیچ بلوچستان تحصیل مند ئٹی ودی مس۔ او بنیات آن تینا موبائل آن عکس کشی ئے بنا کرے و اِرا ہزار پانزدہ ٹی عکس کشی نا کاریم ئے تینا کرے۔
ہِنوکا سال اسہ انٹرویو ئسیٹی پارے کہ او تینا وطن نا زیبائی و ویل آتے دنیا نا مونا پھاش کننگ نا جہد ئٹیءِ۔
کمانچر بلوچ تینا عکس و ندارہ کشی ئے بلوچ حلقہ آتون اوار پیشن نا جہان ئٹی ہم سَر کرفّے۔ اونا عکس کشیک کراچی و پنجاپ ئٹی ہم پھاش کننگار۔
کمانچر نا کیمرہ نا خن بلوچستان نا مرغنی و پہناد آتان ہلیسہ بھازا ندارہ آتے نشان تس و زیبائی تے اسہ جْوانو وڑ ئسیٹ مونا ہیس۔ اونا عکس آک شال ئنا برفی آ مَش تان ہلیس گْوادر نا زیباغا ساحل اِسکان سفر کیرہ۔ داڑیسکان کہ مکران نا "اومیتاتا گودی” ہم اوفتیٹ اوارءِ۔
او بلوچستان نا زیبائی تون اوار اُلس ئنا محنت، دود و فن ئے ہم درشان کرے۔ او بلوچ نیاڑی تہ لائیخی نا کشیدہ و امبل آتا چاہِل (سواس) و بلوچی چھوَٹ آتا عکس بندی کرے۔ اونا کاریم بلوچستان نا نوَد ءُ پنچ فیصد نا زیبائی ئے پھاش کرے ارا اونا کاریم نا سُہبمندیءِ۔
کمانچر نا پِن آ چائنگوک سرور بلوچ اینو بیست ءُ پنچ سال ئنا عمر ئٹی کراچی ٹی جہان ئے الّا او بھلّو وخت ئسے آن بھازا ناجوڑی تہ گْواچی اسک۔
