بلوچستان یونیورسٹی آن زوراکی ئٹ بیگواہ مروکا خوانندہ آتا مُرغنا بیگواہی نا برخلاف سوشل میڈیا مہم ئس چلّفنگو۔ بلوچ وائس فار جسٹس
بلوچ وائس فار جسٹس نا نیمہ آن شنگ مروکا درشان ئسیٹی پاننگانے کہ یک نومبر اِرا ہزار بیست ءُ یک آ بلوچستان یونیوسٹی آن بیگواہ مروکا سہیل بلوچ و فصیح بلوچ نا آجوئی کن سوشل میڈیا ایکس (ٹویٹر) آ بیست ءُ یک اپریل اِرا ہزار بیست ءُ چھار آ شام ئنا ہفت آن ہلیس دوانزدہ بجہ اسکان مہم ئس چلّفنگو۔
درشان ئٹی پاننگا کہ یک نومبر اِرا ہزار بیست ءُ یک آ جامعہ بلوچستان نا تہہ آن سہیل و فصیح بلوچ ئے بیگواہ کننگا۔ اوفتا بیگواہی نا برخلاف خوانندہ گَل آک برانز کریر، کلاس آتان پیشتمار، او وخت آ مُسکوہی صوبائی حکومت و اپوزیشن نا اسہ کمیٹی ئس جوڑ کننگا ارا خوانندہ آتو مزاکرات کرے و پارے کہ منہ دے آن پد سہیل و فصیح بلوچ ئے یلَہ کننگو ولے اِرا سال مننگ آن پد ہم دائسکان او یلہ کننگتوس۔
درشان ئٹی پاننگا کہ سہیل و فصیح بلوچ نا بیگواہی، سرکاری وعدہ آتا پِنّنگ و خوانندہ آتا آجوئی کِن بیست ءُ یک اپریل آ ایکس (ٹویٹر) آ مہم ئس اڈ تننگو۔
او پارے کہ کُل سیاسی و چاگڑدی تنظیم، بندغاک، خوانندہ، حوالکار، وکیل، بندغی حق آتا و میڈیا نا باسک آتیان خْواستءِ کہ او دا مہم ئٹی بشخ ہلیر و سہیل وفصیح بلوچ نا آجوئی کِن توار بُڑز کیر ۔
