مستونگ : زوراک آ پاکستانی لشکر غلام اللہ لہڑی و حسین ئے دزگیر کرِسا بیگواہ کرے ۔
حوالکارنا رِد ئٹ 26 مارچ 2024 ئنا نن ئنا دوازدہ ءُ نیم بجہ آ سی ٹی ڈی و ڈھکوک ادارہ آتا کارندہ آک چھاپہ خلیسہ غلام اللہ لہڑی ئے دزگیر کرِسا بیگواہ کریر ۔
زوراک آ لشکر چھاپہ نا وخت آ اُراتہ پٹ و پول کننگ تون اوار چُنا و زالبول آتے ہم تشدد نا گواچی کریر ۔
غلام اللہ لہڑی نا خاوت اونا زوراکی ئٹ بیگواہی نا ہیت ئے پک کرسا پارے کہ ننے اونا زوراکی ئٹ بیگواہی آن پد ہچ وڑ ئنا چائنداری ئس تننگتنے کہ او ارانگءِ و امرءِ ۔
خاوت نا پاننگءِ کہ غلام اللہ لہڑی آ امرو دوبہ ئس ارے اودے عدالت نا مونا ہتنگ مرے ۔ دا وڑ آ ننا تیوعہ خاوت رنج و غم تہ گواچی ءِ ۔
ہندُن 19مارچ 2024 ئنا شام دوازدہ بجہ آ پاکستانی لشکر مستونگ چلتن پمپ ئنا خُڑک آ صدام حسین پنی ءُ ورناس ئے دزگیر کننگ آن پد بیگواہ کریر ۔ زوراکی ئٹ بیگواہ مروکا ورنا مستونگ نا ہند کلی عزیز آباد نا ہندیسءِ ۔
