مشکے نا ہندی ممتاز بلوچ ایڑ ئنا مسڑ بانڑی بلوچ پارینے کہ کنا اِلہ ممتاز بلوچ ئے 6 ستمبر 2022 آ خضدار آن مُسٹمیکو واع زوراکی ئٹ بیگواہی نا گواچی کننگانے۔
او پارے کہ نن تدوکا یک و نیم سال ئے ڈکھ ئٹ گدریفینن۔ خضدار آن زوراکی ئٹ بیگواہ کننگوک کبیر بلوچ، عطا اللہ و مشتاق بلوچ نا خاہوت تدوکا 15 سال آن اندا ڈکھ ئنا گواچی ءُ۔
او پارے کہ زوراکی ئٹ بیگواہ کننگوک بندغ آتا خاہوت آتا ڈکھ و دڑد ئے اسہ زوراکی ئٹ بیگواہ کننگوک بندغ ئسے نا خاہوت جوان پُہہ مریک و تینٹ اندا دڑد ئنا گواچی ءُ۔
او پارے کہ ببو دا خاہوت آتا توار جوڑ کرین و بلوچ وائس فار جسٹس نا کنڈ آن 27 مارچ 2024 آ کبیر بلوچ، عطاء اللہ و مشتاق بلوچ نا آجوئی کن X آ شام 7 بجہ آن 12 بجہ اسکان مہم ئٹ بشخ ہلین۔ ای نُمے آن سا مہم ئٹ بشخ ہلنگ نا خواست کیوہ، بیگواہ کبیر بلوچ و اونا سنگت آتا خاہوت آتا توار جوڑ مبو۔
خاران نا ہندی بیگواہ شاہ فہد بلوچ نا ایڑ نادیہ بلوچ پارے کہ کنا ایلم شاہ فہد ئے 2022 ئٹی خاران آن زوراکی ئٹ بیگواہ کننگانے۔
او پارے کہ زوراکی نا بیگواہیک بندغی نا برخلاف بھلو ڈوہ اسے، ببو کُل اوار مرسا دا ڈوہ ئنا برخلاف توار بڑز کین۔
او پارے کہ ای کُل سوشل میڈیا ایکٹوسٹ آتیان خواست کیوہ کہ 2009 ئٹی خضدار آن زوراکی ئٹ بیگواہ کننگوک کبیر بلوچ، عطا اللہ بلوچ و مشتاق بلوچ نا آجوئی کن 27 مارچ آ شام ئنا 7 بجہ آن 12 بجہ اسکان مہم چلِفنگ مرو، نُم کُل آن خواست ءِ کہ دا مہم ئٹی بشخ ہلِسہ زوراکی نا بیگواہی تا برخلاف جنگ ئٹی خاہوت آتون اوار مبو۔
