بلوچستان نا ضلع قلات و پنجگور ئٹی مروکا جلہو تیٹی پاکستانی لشکر نا کیمپ و پوسٹ آتے راکٹ و ایلو جلہو تیٹی نشانہ کننگا۔ جلہو تیٹی لشکرئے جانی نسخان رسینگ نا حوالءِ۔
ہنوکا شام قلات نا ہند جوہان ئٹی اڈ مروکا پاکستانی لشکر نا بھلا کیمپ ئنا چوکی تہ نادُرست سلاہ بند بندغ آک جلہو کریر۔ جلہو نا وخت تراک و سُمکاری نا توار بننگا۔
ضلع پنجگور ئٹی رخشان دیر ئنا ٹک آ لشکر نا پوسٹ آ نادُرست سلاہ بند بندغ آک ہنوکا شام یک بجہ نا وخت آ راکٹ و سُمکاری کریر۔
جلہو تیٹی نسخان نا رد ئٹ کالخواہ تہ ہچو درشان ئس مونی بتنے۔
بلوچستان ئٹی تیزی تون پاکستانی لشکرئے جلہو تیٹی نشانہ کننگءُ۔ گیشتر جلہو تہ ذمہ واری تے بلوچ آجوئی خواہوک سلاہ بند تنظیم آک ہرفسا بسنو ولے دا جلہو نا بابت ئٹ دائسکان ہچو تنظیم ئسینا درشان ئس مونی بتنے۔
