اقوام متحدہ نا بندغی حق کونسل نا 55 میکو مجلس نا وخت آ، بلوچ نیشنل موومنٹ نا ڈنی کاریم تہ شعبہ نا فوکل پرسن حکیم بلوچ بلوچستان ئٹی پاکستان نا نسل کشی پالیسی تتون مون تننگ کن جہانی مداخلت نا خواست کرے۔
او پارے کہ اقوام متحدہ نا کنڈ آن بلوچستان نا تحریک آزادی نا دمدستی مُخ تفی المی ءِ۔
کونسل تون تران کرسا حکیم بلوچ پاکستان نا زیرقوضہ بلوچستان نا الس ئنا زی آ مروک کیہی دہک آن ظلم و زوراکی تہ بابت ئٹ ہیت کرے۔ او 1948 ئٹی بلوچستان نا زوراکی ئٹ پاکستان ئٹی اوڑدئی آن پد پاکستان نا منظم ناانصافی تے شیف خلک، ارافتیٹی سیاسی پدماندگی، معاشی استحصال و دود ربیدئی جبر اوار ءِ۔
او اقوام متحدہ آ زور شاغا کہ او بلوچ اُلس ئنا حق خودارادیت نا جائز خواست آتے منّے، دا حق اقوام متحدہ نا چارٹر ئٹ اوار ءِ۔ او زور ترسا پارے کہ بلوچ الس پرایمن وڑ ئٹ آزادی نا جہد کرینے، ولے اوفک پاکستانی ریاست نا کنڈ آن تشدد، دڑکو و زوراکی تون مون تننگ ءُ۔
‘بلوچ نیشنل موومنٹ، بلوچ اسٹوڈنٹس آرگنائزیشن-آزاد تون اوار ایلو تنظیم آتیا رکھ خلِسہ بلوچ راج ئے سیاسی کاریم تہ حق آن پد بِٹنگانے۔’
بی این ایم نا نمائندہ زوراکی ئٹ بیگواہی، بیدس عدالت کوش و بیدس سوب دزگیری تے پاکستان نا کنڈ آن اختلاف رائے ئے توننگ و بلوچ مزاحمت ئے توننگ کن کارمرز کروک ہڑدیئی چم بازی پارے۔
او جہانی برادری آن بلوچ الس ئنا حق خود ارادیت نا جہد ئنا مخ تفی کننگ نا خواست کرسا اقوام متحدہ آ زور تس کہ او دا ہیت ئے یقینی کننگ کن مداخلت کیر کہ بلوچستان نا بھاتیک آجوئی ئٹ تینا مستقبل نا فیصلہ ئے کیر۔
ایسر ئٹ حکیم بلوچ دا نازرک آ ویل ئنا کنڈ آن پام تننگ آ کونسل نا منتواری ئے ہلیسہ دمدستی کارروائی نا خواست آ زور شاغا۔
