گوادر ئٹی ترند پِر تیان گڈ خلق و اسکول تیٹ داسکان دیر مُچ ءِ، زند ئنا ہڑدیئی کاریمک داسکان بناء متنو۔
ایب کھیب نا خلق آتیٹ مخلوق مَش تیا باہوٹ مرسا کمک کن ودار ءِ، داکان بیدس خلق آتیٹ کمکی ٹولیک داسکان سر متنو، گوادر نا بین الصوبائی دگ و حوالکاری نا کسر تے درینے ہرا نا سوب آن کسرک بند ءُ۔
ایلو کنڈ آن اینو پوسکن گچین مروک وزیر اعلیٰ سرفراز بگٹی گوادر نا دؤرہ کرے ہراڑے اونا پاننگ اس کہ نوکاپ و ہار ئنا دیر کیہی اُرا تے بھس کرینے، نسخان تے ہُننگ کن اسہ کمیٹی ئس جوڑ کننگانے ہرا 20 دے ئٹی رپورٹ ایتو۔ او دعویٰ کرے کہ الس کن حکومت تینا غٹ وسائل آتے کاریم ئٹ ہتو۔
بلوچ یکجہتی کمیٹی نا راہشون ماہ رنگ بلوچ تینا ٹیم ئتون اوار درو آن گوادر ئٹی ءِ ہراڑے اونا پاننگ اس کہ ترند پِر تیان گڈ تیبہ گوادر دیر ئٹ ٹُبانے ولے حکومتی دعوی تیان بیدس گوادر نا ہندی مخلوق ئے آسراتی تننگ متنے و بندغ آک تینا کمک ئے تینٹ کرسا دا سخت انگا وخت ئے گدریفنگ ءُ۔
بلوچ یکجہتی کمیٹی بلوچستان تون اوار تیبہ جہان آن زیمی مروکا بندغ آتے کمک کننگ نا خواست کرینے و بلوچستان نا ڈاکٹر و کمکی تںظیم آتیان دمدستی گوادر آ سر مننگ نا خواست کرینے۔
گوادر تون اوار بلوچستان نا ایلو زیمی مروکا علاقہ آتیٹ ت پِر تا سوب آن ودی مروکا حالیت و حکومت نا بےسوبی آن گڈ ینگ ڈاکٹرز ایسوسیشن گوادر ئٹ تینا رضاکار تے راہی کننگ نا فیصلہ کرینے، غٹ ڈاکٹر تنظیم، این جی او، سیاسی تپہ غاک ہار آن زیمی مروکا تیکن کمکی کارروائی بناء کرور۔
ایلو کنڈ آن گوادر آن بیدس بلوچستان نا ایلو شارک ہم پِر و برف آن زیمی مسنو۔ ژوب ڈی آئی خان کسر آ دھاناسر نا جتا مَشی آ ہند آتیا 200 آن زیات مسافر اُلاخ گھٹ مسنو۔ چمن، قلعہ عبداللہ و پشین نا شاری علاقہ آتیٹ وقفہ وقفہ آ برف ئنا لڑ برجاء ءِ۔
