بلوچستان نا گیشتر علاقہ آتیٹ پِر تا چرجوئی برجاء ءِ، خاران ئٹ اُرا نا چھت تمنگ آن چُنا تتون اوار باوہ بیران مس، و مچھ ئٹی پُہل ءِ دیر درے ہرا نا سوب آن ہِن و بر بند مس۔
بلوچستان ترند پِر تا پلویڑ ئٹی ءِ، جتا علاقہ آتیٹ تدوکا دے تیٹ پِر بناء مننگ نا سوب آن گیشتر مخلوق نا زند زیمی مسنے و جتا علاقہ آتیٹ دیر مُچ مننگ نا سوب آن اُرا تیٹ دیر بسنے و ہار ئنا دیر کسر تے پرغانے ہرا نا سوب آن کسرک بند مسنو۔
بلوچستان نا ضلع چاغی ٹی کیہی دے ئنا پِر تا سوب آن کسر تے دیر درینے و ہار ئنا سوب آن پن کروک علاقہ آتا کسری حوالکاری پنانے و ایران آن بروکا کیہی مال گاڑیک گھٹ مسنو۔
چاغی ٹی پِر تا سوب آن کیہی بندغ آک نوکاپ نا دیر ئنا نیام ئٹ گھٹ مسنو و کمک کن ودار کننگ ءُ۔
خاران ئٹ چرجوئی ئٹ پِر مننگ آن کلان نا ہند آ اُرا ئسے نا چھت تمنگ نا سوب آن باوہ تینا اِرا چُنا تون اوار بیران مسنے و ہندی مخلوق اوفتے کشانے ولے باوہ و چُناک بچنگ کتنو۔
ایلو کنڈ آن نوشکی ٹی پِر تیان نالیک پُھر مسنو، ریلوے لائن باہ کرینے ہر نا سوب آن پاک ایران ریلوے بند مسنے و داڑان بیدس خضدار، نال، وڈھ تون اوار جتا علاقہ آتیٹ پِر، کوہلو شار و ایب کیب ئٹ پنچ ساعت آن پِر مننگ ءِ۔
بلوچستان نا قلات شار و ایب کیب ئٹ استو آن وقفہ وقفہ ئٹ پِر مننگ ءِ پِر تیان شیفکو علاقہ آتیٹ دیر مُچ مسنے، محکمہ مُد ئنا رد ئٹ شار و ایب کیب ئٹ تدوکا ہشت ساعت ئٹ 18 ملی میٹر پِر ریکارڈ کننگانے و بروکا بیست و چھار ساعت ئٹی پین زیات پِر و مش تیا برف ئنا گمان ارے۔
دانگان پنجگور و ایب کیب ئٹ ترند پِر تا چرجوئی برجاء ءِ ہراڑان شیفکو علاقہ غاک زیمی مسنو۔ خیال ئٹ مرے، پنجگور ئٹ خدو پِر و ہار آن زیمی مروک بندغ آک داسکان ہڑاند آتا گواچی اسر و داسا مروکا پِر تیان اسہ وار پدا اوفتا عارضی اُراک زیمی مسنو۔
اندن پِر تا سوب آن مچھ پُہل ئنا کسر ہن و بر کن بند مسنے و پیشکان آن گوادر آ ہنوکا کسر ءِ شابی نا ہند آ دیر درینے ہرا نا سوب آن پیشکان تون گوادر نا زمینی کسر بند مسنے۔
داکان بیدس محکمہ مُد بلوچستان نا رد ئٹ نوکنڈی، دالبندین، چاغی، قلات، خضدار، لسبیلہ، آواران، تربت، کیچ، گوادر، جیونی، اورماڑہ، پنجگور، خاران، نوشکی، واشک، مستونگ، سبی، نصیرآباد، ڑوب، شیرانی، بارکھان، موسیٰ خیل، کوہلو، جھل مگسی، لورالائی، زیارت، کوئٹہ، چمن، پشین، قلعہ عبداللہ و قلعہ سیف اللہ ٹی گیشتر ہند آتیا تیز تہو، و پِر تا گمان ارے۔
کوئٹہ ٹی درو کم ئس کم درجہ حرارت 3 ڈگری سینٹی گریڈ، قلات ئٹ 2، سبی ٹی 9، نوکنڈی ٹی 8، تربت ئٹی 16، جیونی ٹی 15 و گوادر ئٹی 17 ڈگری سینٹی گریڈ ریکارڈ مسنے۔
