اسلام آباد آن بلوچ خوانندہ ئے زوراکی ئٹ بیگواہ نا گواچی کننگا۔
شابیتی حوال تا رد ئٹ چھار شمبے نا دے بلوچستان آن تعلقداری تخوکا ورنا امتیاز عالم ئے، ہرا پنجاب نا شار اسلام آباد ئٹ خواننگ کن رہینگ اس، پاکستانی ڈھکوک ادارہ غا تا کارندہ غاک زوراکی ئٹ بیگواہ کرسا تینتو درینو۔
خوانندہ امتیاز عالم، نال خضدار ئنا ہندی ئے ہاسٹل آن ایمبولنس ئٹ زوراکی ئٹ بیگواہ کننگانے۔ بیگواہ مروک خوانندہ ہیراڈ ایگریکلچر راولپنڈی آن گریجویٹ کرینے و نیشنل انسٹی ٹیوٹ آف ہیلتھ اسلام آباد آن ایم فل کننگ اس۔
تدینی ئے پک کرسا امتیاز عالم نا سنگت آک وڈیو ئس ہم شنگ کرینو ہراٹی بیدس نمبر پلیٹی ءُ ایمبولینس ئس ترندی ئٹ ہِننگ آ خننگ مریک، و وڈیو ٹی اسہ بندغ ئس پاننگ ءِ کہ دا ایمبولینس ئٹ اوفتا سنگت امتیاز عالم ئے زوراکی ئٹ سلہہ بند بندغ آک دننگ ءُ۔
چاگڑدی حوالکاری میڈیا غا تدینی نا ویڈیو ئے جتا سیاسی و چاگڑدی گل و صحافی تا کنڈ آن تالان کننگانے۔
ویڈیو ئے تینا ٹائم لائن آ شیئر کرسا پاکستان نا پنی آ صحافی و تجزیہ کار حامد میر نا پاننگ اس کہ دیہاڑ ئٹ دا ہم لکھنگو کہ ہرا وخت انوارالحق کاکڑ پاکستان نا وزیراعظم اس تو بلوچ آتے ایمبولینس گاڑی تے بیگواہ کننگ نا لڑ بناء کننگا تاکہ ویگو گاڑیک تا بد پنی کم مرے۔
