بلوچستان نا علاقہ بولان ئٹ اینو مسٹمیکو دے ہم پاکستانی لشکر نا زوراکی برجاء ءِ، اِرا کھریا ہم بیگواہ کننگانے۔
شابیتی حوال تا رد ئٹ اینو مسٹمیکو دے سبی شار و بولان تون تفوک مشی آ علاقہ غا تیٹ ہیلی کاپٹر آتا ہن ءَ بر برجاء ءِ۔ ہندی حوال تا رد ئٹ مش تیٹ ہیلی کاپٹر آتا شیلنگ و تراک آتا توار ءِ۔
حوال تا رد ئٹ آپریشن ئٹ علیان پنی ءُ اسہ بھاگیا ئسے نا اِرا مار درو آن بیگواہ ءُ۔
ہندی مخلوق نا پاننگ ءِ کہ پن کروک تومکا بندغ آک سوئی شابان نا علاقہ ٹی تینا کُھر ءِ خوافنگ اسر، ولے داسا بیگواہ ءُ، خلیس ءِ کہ لشکر کشی نا وختا اوفتے دزگیر کرسا پاکستانی لشکر بیگواہ کرینے۔
خیال ئٹ مرے کہ پاکستان لشکر بولان و اوڑتون تفوک علاقہ غا تیٹ بھلو کچ ئسیٹی لشکر کشی کننگ ءِ، ہرا نا پلویڑ ئٹ بزگر، لکڑ، سانگان، لاکی، جمبرو، چکی وڈھ، میاں کور و ہیب کھیب ئنا علاقہ غاک ءُ۔
ایلو کنڈ آن ضلع کیچ ئنا تحصیل تمپ ئنا علاقہ دازن آن حوال رسینگانے کہ استو ننکان پاکستانی لشکر اِرا ورنا ءِ دزگیر کننگ آن گڈ بیگواہ کرینے۔
بیگواہ مروک آتا چاہنداری موسی نا مار علی جان و رشید نا مار وحید نا پن ئٹ مسنے۔
