سندھی قومپرست موہکش و وائس فار مسنگ پرسنز آف سندھ ئنا سروک سورٹھ لوہار و سسئی لوہار نا باوہ شہید ہدایت لوہار نا ریاستی خون ئنا برخلاف برانز چرجوئی ئٹ پنچ دے برجاء سلینگ آن گڈ استو ننکان پریس کانفرنس آن پد ایسر کننگا۔
پریس کانفرنس کرسا سورٹھ لوہار و سسئی لوہار نا پاننگ اس کہ نن تینا باوہ نا خون ئنا ایف آئی آر کن کورٹ ئٹی پٹیشن ترسا قانودی پراسز ئے مُستی درینن، ولے پاکستانی عدالت آتیان ننے انصاف نا ہچو امیت اف، ننا انصاف نا عدالت ننا سندھی قوم ءِ۔
او پاریر کہ نن تینا ہم فریاد ئے سندھی قوم ئنا مونا دننگ اُن، دا رد ئٹ ننا جہد ئنا ارٹمیکو لڑ ئٹی اینو تیبہ سندھ ئٹی برانزی ریلیان کشنگ نا خواست کینہ۔
او پڑو کریر کہ جہد ئنا مسٹمیکو لڑ ئٹی نن سندھ ئٹی اسہ بھلو برانز ئسے نا پڑو کرون۔ ننا جہد بیرہ ننا باوہ نا ریاستی خون ئنا برخلاف اف بلکہ سندھ ئنا ہمو غٹ مظلوم آ بندغ آتا ناحق ریاستی خون، زوراکی نا بیگواہی و ظلم و بربریت نا برخلاف ہموتم اسکان برجاء سلو ایسکان کہ دا فاشسٹ پاکستانی ریاست ننا ڈغار آ تینا فوجی کوزہ ئے برجاء تخسا تینا توفنک نا زور آ ننا بندغ آتیا ظلم و زوراکی کرو۔
انھوں پاریر کہ پاکستانی فوج ننا باوہ شہید ہدایت لوہار ئے سندھ ئنا آزادی نا جہد ئنا ڈوہ ئٹی شہید کرینے۔ شہید ہدایت لوہار تون اوار سندھ ئنا غٹ شہید آتا بیر ئے نن تینا ڈیہہ ئنا آجوئی نا دروشم ئٹ ہلون۔ جہد برجاء مرو۔
