چمن بارڈر آ پاسپورٹ سسٹم ئے ہتنگ نا برخلاف ہنوکا چار تُوو آن برانز برجاء ءِ ،یک شمبے و دو شمبے نا نیامی نن برانزی تینا برانز ئے بھلن کرسہ چمن آفس نا مون آ کنٹینر خلیسہ پاسپورٹ آفس ئے بند کریر ۔
انتظامیہ و ایف سی نا نیمہ آ نن ئنا نیمہ آ پاسپورٹ آفس نا مون آ برانزی کیمپ آ چھاپہ خلکر و پاسپورٹ آفس نا مون آن کنٹینر آ تے ارفیر ، ایف سی و انتظامیہ نا نیمہ آ ن صادق اچکزئی تون اوار ایلو بندغ آتے دزگیر کننگا ۔
دا نا رد عمل ئٹ ایلو رہشون آتا نیمہ آن چمن ئٹی شٹر ڈاؤن ہڑتال کننگا و چمن کوئٹہ بین الاقوامی کسر آ ہڑاند تخیسہ کسرئے بند کریر ۔
برانزیک ڈسٹرکٹ پولیس آفیسر نا مون آ برانز کریر ، ایف سی قلعہ آ خل خلکُر ، برانزی تے یکہ کننگ کن ایف سی کارندہ آک آنسو گیس شیلنگ کریر ، برانزیک ایف سی قلعہ و ڈی پی او آفس نا مون آ بھلو کچ ئسیٹ ساڑی ءُ۔
برانز آن جنرل سیکرٹری و لغڑی اتحاد نا رہشون غوث اللہ اچکزئی میڈیا تون ہیت کرسہ پارے کہ برانزی تہ آجوئی اسکان چمن ، کوئٹہ کسر ایف سی و ڈی پی او آفس نا مون آ برانز برجاء مرو۔
