بلوچستان نا ضلع کیچ ئنا بنجائی شار تربت ئٹی ڈی بلوچ پوائنٹ ایم ایٹ کسر و کیساک نا ہند آ زوراکی نا بیگواہی تا برخلاف تولوک برانز برجاء ءِ۔
ڈی بلوچ نا ہند آ اسہ ہفتہ ئسے آن زوراکی نا بیگواہی تا برخلاف تولوک برانز مننگ ءِ ہرانا سوب آن کسر آ اُلاخ آتا ہن ءَ بر بند ءِ۔
تولوک برانز ئے ضلع کیچ ئنا جتا علاقہ آتیان زوراکی ئٹ بیگواہ کننگوک بندغ آتا پنچ خاہوت بناء کریسر ہرافتے بی ایس او پجار، بی ایس او و تربت سول سوسائٹی نا مخ تفی دوئی ءِ۔
استو ایس ایس پی کیچ ضیاء مندوخیل و ڈی ایس پی کیچ چاکر بلوچ ڈی بلوچ آ تولوک برانز نا جاگہ غا ہنیسہ برانزی تتون گپ و تران کریر۔
خاہوت آنا ردئٹ پولیس افسر آک اسہ ورنا ئسے آ ایف آئی آر کرسا اودے اینو پنجگور ئٹ پولیس نا دو ٹی تننگ آن بیدس اینو دو بجہ اسکان اِرا ورنا ئے خاہوت آتے تننگ و ایلو مُسہ بیگواہ تا بارو ئٹ 10 فروری اسکان حوال تننگ نا باوری تسر۔
خاہوت آنا ردئٹ پولیس تون گپ و تران غٹ بیگواہ بندغ آتا رکھوک یلہ مننگ اسکان بےسوب مس، خاہوت آک پولیس آ شش بیگواہ بندغ تے اینو رکھوک یلہ کرسا خاہوت آتے تننگ نا شڑط آ کسر ئے ملنگ نا فیصلہ کریر واہم پولیس افسر آک دا خواست آتے پوروْ کننگ ئٹ بےسوب مسر۔
ارٹمیکو پارہ غان تربت کیساک ئٹ بیگواہ غا ورنا نا یلہ مننگ کن سی پیک کسر بند کننگا۔
حوال تا ردئٹ عابد نا مار وشدل پنی ءُ ورنا ئسے نا وے آجو نا برخلاف کیساک نا ہند آ علاقہ نا بندغ آک سی پیک کسر ئے بند کرینو۔ برانزی تا ردئٹ پن کروک ورنا ئے آپسر آن 21 مارچ 2023 آ زوراکی ئٹ بیگواہ کننگاسس۔
برانزیک پاریر کہ پاکستانی لشکر تولوک برانز جاہ آ برانز کروکا تے بیدادی نا گواچی کرے، اوفتا ردئٹ گچین کاری عملہ و مڈی دروک کاروان نا کارندہ غاک اوفتے بیدادی نا گواچی کریر۔
