
بلوچستان نا جتا ہند آتیان ہفت بندغ نا زوراکی ئٹ بیگواہی نا رپورٹ آک مونا بسنو۔ بیگواہ کننگوک آتیٹی محمد ابراھیم، اسفند، محد الدین، دانیال، نور محمد و طارق اوار ءُ، ہرافک جتا وخت آتیٹی بیگواہی نا گواچی مسنو۔
شابیتی حوال تا رد ئٹ نوشکی نا ہندی محمد ابراھیم ولد گل محمد ءِ 11 نومبر آ صاحبزادہ روڈ نوشکی آن بیگواہ کننگانے۔ ہندن گائی خان چوک نا تولوک ارا بندغ اسفند علی محمد و محد الدین ولد علی محمد شاہوانی ءِ 24 اکتوبر آ بیگواہ کننگانے۔
شال ئنا ہندی دانیال ولد امان اللہ ہم 15 نومبر آن بیگواہ ءِ۔ ہندن پنجگور نا ہند پروم آن نور محمد ولد محمد ایوب ئے 12 نومبر آ ارٹمی وار بیگواہ کننگانے۔
ایلو نیمہ غا پنجگور نا علاقہ شکاری بازار نا ہندی طارق ولد آدم 9 نومبر آن بیگواہ ءِ۔
ہندا وڑ بہزاد دلاوری ہرادے اِرا سال مُست بیگواہ کننگاسس، آجو مرسہ تینا اُرا ءِ سر مسُنے۔
