براہوئی مٹ: شئے رحمت بلوچ
مزاحمت: بحثیت بلوچ راجی و مزاحمتی رہشون نی بلوچستان نا ساڑی آ سیاسی، چاگڑدی مزاحمتی حالیت ئے امر ہرُسہ؟
ڈاکٹر اللہ نذر بلوچ: رد انقلابی تاغت آتے ساندہ جہانی سامراج نا کمک و مخ تفی دوئی مسُنے۔ بحثیت اسہ آجوئی نا سپاہی، بلوچستان نا مخصوص سیاسی و چاگڑدی صورت حال تینا خاص چاگڑدی وضع تون بھلو بدلی ئس نہ بیرہ کنے بلکن بلوچستان نا آجوئی آ نظر تخوکا ہر باشعور آ بندغ و جہانی تاغت آتے نظر بریک۔ دہن کہ چین ئنا وڑ اِنگا دیوہیکل توسیع دوست تاغت ئے تینا چاگڑدی منصوبہ تیان پدی ہڑسنگ تمنگ ءِ۔ نی تینٹ خننگ کیسہ کہ بلوچستان ئٹی ایلو کثیر القومی سرمایہ دار بلوچ سرزمین آ سرمایہ کاری آن خُلیگ ئٹی ءُ، و قوضہ کروک و انقلابی تاغت آتا توازن بریبر اف۔ ولے بلوچ راج ئنا بے حساب سدخئی تا سوب آن نہ بیرہ قوضہ کروک پاکستان بلوچ راجی جنز آجوئی نا حقانیت نا( کٹھ پتلی مھالو نا وزیر اعظم کاکڑ بین القوامی میڈیا نا مونا) پک کرینے کہ بلوچ تینا آجوئی نا جنگ ئے کننگ ءِ۔ ثقافتی ورثہ ئے نہ بیرہ رکھنگ مسُنے بلکن بلوچ چاگڑد ئٹی انقلابی تاغت آتا سوب آن اسہ عظیم او انقلابی ادب ئس ودی مسُنے۔ ایلو پارہ غان بلوچ زالبول آک جنز آجوئی ٹی بھلو کڑدار ئس ادا کننگو، ہراکہ انقلابی جنز آتیکن بھلو سرسوبی ئس ءِ۔ رد انقلابی ملیٹری آپریشنز و ڈیتھ اسکواڈ جوڑ کننگ و جمہوریت نا پن آ بلوچ جنگ آجوئی نا مونا بحثیتِ اسہ سلاہ ئس کارمرز کننگ ئٹ بےسوب مسُنو۔ 8 فروری آ بیرہ پن ئنا انتخاب آتیٹی بلوچ نا وے ساڑی مننگ پاش مثال ءِ۔
مزاحمت: نی علاقائی صورتحال بالخصوص اسرائیل- حماس جنگ و جہانی صورتحال ئے امر ہُرسِہ؟
ڈاکٹر اللہ نذر بلوچ: ہراڑسکان ننا بحثیت راج ئنا سیالی ئے نن علاقائی یا جہانی معاملہ غاتے آ مثبت یا منفی مرتب مننگ آن بیدس مننگ کپنہ۔ داسہ دنیا پین unipolar افک۔ چائنا و روس ئنا اتحاد و انڈیا امریکا انڈوپیسفیک اتحاد ئے ہرِسہ “حماس-اسرائیل” جنگ ہچو ناپید او گڑاس افک۔
مزاحمت: ایہن تو بلوچ مزاحمت بھاز مُتکن ءِ و تدوکا 20 و 25 سال ئنا جنگ ئٹی ننا اسٹ انگا دشمن پنجاب سامراج نا بھلو کچ ئسے ئٹ فوجی، مالی و جانی نسخان ہم مسُنے۔ ولے پدا ہم دا کُل آن بیدس او ہرا سوب و فیکٹرز آکو ہراکہ بلوچستان نا آجوئی نا دوئی کننگ ئٹی مشکل جوڑ ءُ؟
ڈاکٹر اللہ نذر بلوچ: نظریاتی حوالہ ئٹ بلوچ مزاحمتی جنز زوراکی ئٹ قوضہ غان بناء مس۔ ہراڑسکان کہ تدوکا بیست سال ئنا سیاسی و گوریلا جنگ ئنا ہیت ءِ او تینا وڑ آن بھاز بدل ءِ و ہندا سوب ءِ کہ ننا دشمن ئے فوجی، مالی و جانی نسخان مسُنے اوڑتون اوار اوار نفسیاتی حوالہ ئٹ ہم شکست کنگنے۔ نا سوال نا ایلو بشخ کہ آجوئی نا دوئی کننگ ئٹی مشکل آتا رد ئٹ ای ہندا پوہ مریوہ کہ دنیا ہم، کہ دا اسہ ڈیپ اسٹیٹ ئس ءِ و دہشتگری نا منبع مننگ تون اوار اوار ایٹمی ہتھیار تخوکو اسہ ملک ئس ءِ۔ ای ہندا سمجھوہ کہ جہانی تاغت دانا کرائی آ فوج ئے اڑزانی ئٹ تینا مفادات آتیکن ہلنگ کیرہ۔ ہندا خاطر آن دادے داسکان آکسیجن ٹینٹ ئٹی تخانو ہرا دنیا مہذب سمجھک دا اونا منافقی ءِ۔ حالانکہ تدوکا سوویت یونین پاکستان آن بھاز بھلو ایٹمی تاغت ئس اسک، ایلو سوب آتون اوار اوار اونا تاغت ئے ٹُکر ٹُکر کرے۔ کنا خیال ئٹی دا غیر فطری ریاست پاکستان تینا اتحاد ئے 25 سال اسکان رکھنگ کتَو۔ ساڑی آ غیرفطری ریاست پاکستان تینا طبعی عمر ئے پورہ کرینے و دا داسہ برجاء سلنگ کپک۔
مزاحمت: جنوبی ایشیاء نا دا خطہ ٹی غلام جوڑ کننگوکا تاریخی اِرا راج بلوچ و سندھی تا آجوئی کِہ علاقائی و جہانی صورتحال اخہ در حق ئٹی ءِ؟ یا دا صورتحال ئے تینا حق ئٹی امر بدل کننگ مروئے؟
ڈاکٹر اللہ نذر بلوچ:
ای سمجھوہ کہ جنوبی ایشیاء ٹی کُل آن سبّر و تاغتور آجوئی نا جنز ئٹی کُل آن زیات تاغتور جنز بلوچ و سندھی تا ءِ و پشتون جنز ہم کاٹم ہرفنگ ئٹی ءِ۔ ای مھالو ہم پارینُٹ کہ جہانی و علاقائی تاغت ننا جنگ آن ڈارکٹ یا انڈارکٹ فائدہ ہرفنگ ئٹی ءُ دا ہم سمجھانو کہ آجو بلوچستان و سندھودیش اوفتا حق ئٹی ءِ ولے تینا ریاستی مفاد آتا خاطر آن دا سبر آک حقیقت ئے خلاسنگ ئٹی لڑزہ نا شکار ءُ۔ نی خننگ کیسہ کہ دا بدمعاش آ ریاست نا کاریم تیان اونا ہمسایہ غاک نہ بیرہ وے رکھوک ءُ بلکن امریکا ٹی 9/11 نا تدینی مرے یاکہ ممبئی جلہو مرے یا لندن جلہو مرے یا داسہ کندھار افغانستان نا تدینی مرے یا کرمان ایران نا تدینی مرے یا روس ئنا کنسرٹ ہال ئنا تدینی مرے دا کُل ئنا رگ و ریشہ نا ردوم پاکستان ئٹی مننگ ئٹی ءِ و دا جہانی امن و سلامتی کہ اسہ بھلو خطرہ ئس ءِ۔ کنا خیال ئٹی علاقائی تاغت آک دا درک ئے تخرہ۔ راجی جغرافیائی و ثقافتی ریاست یعنی آجو بلوچستان، سندھو دیش و پشتونستان جہانی امن نا ضامن آک ءُ۔
مزاحمت: بلوچ آجوئی دوست مزاحمتی تنظیم آتا اتحاد”براس” ئتو اوار سندھی آجوئی دوست تنظیم”ایس آر اے” ہم اتحاد ئٹی اوار ءِ۔ دا اتحاد بلوچستان و سندھ ئنا آجوئی نا جنگ ئٹی اخس پیش قدمی کننگ کرینے؟ یا بروکا وخت ئٹی ہرا حکمت عملی تا رد ئٹ تومکا مظلوم راج آتا آجوئی کِہ سوبر و ہُرے اسکان برجاء سلوکو بھرم ہلنگک؟
ڈاکٹر اللہ نذر بلوچ: آجوئی نا جنز پرو ٹریکٹڈ مریک براس و ایس آر اے بھلو اہداف دوئی کرینو کنا دانست نا رد ئٹ دا کہ بلوچ و سندھی و تینا آجوئی نا روانی ئے برجاء تخر کہ دا روانی ٹی ہچو کمی ئس بف و ہندا روانی نا سوب آن تینا سوبر و ہُرے اسکان برجاء سلوکو بھرم دوئی کننگ کینہ انتئے کہ دا وے فطری ریاست ئے فوجی نسخان تون اوار معاشی نسخان دانا کشتی ئے بڈُیفنگ کیک و ہُرے اسکان دنیا دا ناسور ئے قائم تخنگ خواہِپک۔
داڑتون اوار اوار ای پوسکن آ سندھی یعنی اردو ہیت کروکا تے پیغام تننگ خواہوہ کہ نا مرگ و زند سندھ ئٹی ءِ و سندھ آن بیدس نی تینا موقع پرست آتا دو ئٹ استحصال نا شکار جوڑ مرِسہ کاسہ و دا ایلیٹ کلاس نے سوب و شام نفرت نا درس ئے ہیتک و داڑان جان خلاصی دوئی کبو و سندھودیش ئنا آجوئی ٹی بشخ ہلبو۔
مزاحمت: نا دا انٹرویو ایس آر اے نا ترجمان میگزین “مزاحمت” ئٹی سائیں جی ایم سید نا برسی نا وخت آ شنگ کننگ مننگ ءِ۔ دا موقع غا نی سائیں جی ایم سید نا شخصیت و جدوجہد نا رد ئٹ انت پاننگ خواہسہ؟
ڈاکٹر اللہ نذر بلوچ: ای دا میگزین مزاحمت نا ذریعت ئٹ سندھی زانتکار و نوجوان تے سائیں جی ایم سید نا شخصیت نا رد ئٹ دوستانہ پیغام تننگ خواہوہ کہ او سندھی زبان و ثقافت و آجوئی نا جنگ ئے برجاء تخر و سائین جی ایم سید نا فرمودات، علمی جہد ئے تینا زندگی نا بشخ جوڑ کیر و ہرانا علمی جہد و کوشش آک تیبہ محکوم آ راج آتیکن کسر نا چراغ ءُ۔
مزاحمت: نی ایس آر اے نا دا ترجمان میگزین”مزاحمت” نا معرفت سندھی راج باالخصوص سندھی نوجوان تے انت پیغام تننگ خواہِسہ؟
ڈاکٹر اللہ نذر بلوچ: ای سندھی ورنا تے دا پیغام تننگ خواہوہ کہ اوفک تینا راج ئنا جاگیردار طبقہ ئے ہرا کہ ساندہ سندھ ئنا آجوئی نا کسر ئٹی ہڑاند ءُ بلکن پنجاب ئے تاغت تننگ ئٹی ءُ اوفتا رد ئٹ تینا راج ئے آگاہ کیر بلکن مشینری تا وڑ ئٹ سندھ ئنا ہر اُراغا تینا آجوئی نا پیغام ئے سر کیر۔ داڑان ود اتحاد ودی کیر انتئے کہ مظلوم و محکوم نا ونڈ مننگ قوضہ گیر نا حق ئٹی کائک۔
