بلوچستان نا جتا ضلع تیان پین پنچ بندغ زوراکی ئٹ بیگواہ کننگانو۔ خاہوت آتا رد ئٹ دا بندغ آک جتا وخت آتیئٹ اُرا و ایلو جاگہ آتیان دزگیر کننگ آن پد بیگواہ کننگانو۔
حوال آتا رد ئٹ ضلع خضدار نا ہندی 22 سالی آ خوانندہ عبداللہ بلوچ ولد رشید ءِ 04 نومبر 2026 ئنا شام 06:30 بجہ آ پاک اسلامک اسکول نا خُڑک آن ڈیتھ اسکواڈ نا کارندہ آک دزگیر کننگ آن پد بیگواہ کرینو۔
ہندا وڑ ضلع کیچ ئنا تحصیل بلیدہ نا علاقہ سوراپ نا ہندی 20 سالی آ نسیم بلوچ ولد اقبال بلوچ ءِ 03 نومبر 2026 ئنا شام یک بجہ غا اونا اُراغان ایف سی نا کارندہ آک دزگیر کرسا نادُرست جاگہ ئس درینو۔ ہندا شام بلیدہ نا علاقہ ریکو نا ہندی 15 سالی آ آصف بلوچ ولد فضل ءِ ہم اونا اُراغان ایف سی نا کارندہ آک دزگیر کننگ آن پد بیگواہ کرینو۔
ہندا وڑ ضلع سبی نا علاقہ سنگان نا ہندی 37 سالی آ بزغر گل احمد ولد اختر محمد ءِ 22 اکتوبر 2026 ئنا شام ئنا 11:00 بجہ غا اونا اُراغان آئی ایس آئی و سی ٹی ڈی نا کارندہ آک دزگیر کرسا بیگواہ کرینو۔
ہندا وڑ 37 سالی آ ڈرائیور ظاہر بلوچ ولد داد محمد ءِ 21 اکتوبر 2026 ئنا شام 11:00 بجہ غا سبی شار آن آئی ایس آئی و سی ٹی ڈی نا کارندہ آک دزگیر کننگ آن پد بیگواہ کرینو۔
