گریشہ و کراچی آن پاکستانی ڈھکوک ادارہ و ڈیتھ اسکواڈ نا کارندہ غاک اِرا بندغ آتے دزگیر کننگ آن پد بیگواہ کرینو۔
حوال آتا رد ئٹ خضدار نا ہند گریشہ آن ریاستی ڈیتھ اسکواڈ نا کارندہ غاک حاکم بلوچ ولد حضور بخش ءِ دزگیر کننگ آن پد بیگواہ کرینو۔ حاکم بلوچ گریشہ نا ہند لوپ ئنا ہندی ئسے ہرادے اینو سوب ئنا گریشہ آن نال آ ہننگ نا وخت آ بیگواہ کرینو۔
ایلو نیمہ غا کراچی نا ہند ماڑی پور آن استو پاکستانی ڈھکوک ادارہ غاک فاروق گدور ءِ بیگواہ کرینو۔ زوراکی ئٹ بیگواہ کننگوک آ فاروق گدور کراچی نا ہند ماڑی پور نا ہندی ئسے۔ ہرادے ڈھکوک ادارہ آتا کارندہ غاک بھلا اسٹاپ آن اونا دُکان آن بیگواہ کرینو۔
