بلوچ یکجہتی کمیٹی مُسہ زوراکی ئٹ بیگواہ کننگوک او بندغ ریحان الفت، صلاح الدین بلوچ و منیر بلوچ نا زوراکی ئٹ بیگواہی آن پد خلنگ آ اوسوز نا درشانی ئے کرسہ پارینے کہ 17 سالی آ ریحان ولد الفت اسہ خوانندہ ئسے ہرا پسنی نا ہندی ئسے۔ اودے 14 اکتوبر 2026 آ بیگواہ کننگانے۔ ہشت دے آن پد اونا جون ءِ بٹینو۔ ریحان نا عمر 17 سال ءِ داسکان اونا شناختی کارڈ ہم جوڑ متنے۔ او اسہ خوانندہ ئس اسک ہراڑا کیہی اومیت آک تفوک اسُر ولے اودے ناحق خلنگانے۔
بی وائی سی نا رد ئٹ صلاح الدین ولد محمد علی خاران نا ہند کلان نا ہندی ئسے۔ او خاران چیپ کسر آ سبزی بھا کریکہ، اودے 07 اگست 2026 نا نیمروچ آ پاکستانی فوج اونا ایلم ازر تون اوار اُراغان بیگواہ کریسس۔ منہ دے آن پد اونا ایلم ءِ یلہ کریر ولے صلاح الدین توروک اسک۔ اِرا تو ئنا زوراکی ئٹ بیگواہی آن پد 31 اکتوبر 2026 آ دروغ ئنا مونتس ئسیٹی خلنگ آن پد اونا جون خاران نا ہند بدو کور آن دو تمانے۔
بی وائی سی نا رد ئٹ منیر احمد ولد شریف نال ئنا ہند استکلی نا ہندی ئسے و اسہ ڈرائیور ئس مسُنے۔ اودے 02 اکتوبر 2026 نا شام ئنا نُہہ بجہ غا اونا اُراغان ریاستی ڈیتھ اسکواڈ نا کارندہ آک برمتہ کرسا بیگواہ کرینو۔ اسہ تو ئسے اسکان اونا خاہوت ءِ ہچو سرپندی تننگ متنے۔ 02 نومبر 2026 آ اسہ تو ئس پورو مننگ آن پد خلنگ مسُنے و اونا جون نال ئٹی بٹنگانے۔
بی وائی سی خواست کرینے کہ دا تدینی تا بابت ئٹ جوانی ئٹ پٹ ءَ پول کننگ مرے، ذمہ وار آتے سوج کننگے و بلوچستان ئٹی زوراکی ئٹ بیگواہی و غیر قانودی کوش آتا توننگ کن گامگیج ہرفنگ مرے۔
