تمپ ئٹی پاکستانی لشکر جتا جتا جاگہ آتا کاروائی کرسا اِرا ایلم تیتون چھار ورناتے زوراکی ئٹ بیگواہ کرینے، اسہ زوراکی ئٹ بیگواہ کننگوکو بندغ ئسینا جون خننگانے۔
حوال تا رد ئٹ استو تمپ ئنا ہند مند ئٹی پاکستانی لشکر جتا جتا جاگہ آتا چھاپہ خلکُنے، بندغ آتا بےدادی کرینے و چھار ورناتے زوراکی ئٹ بیگواہ کرینے۔
حوال تا رد ئٹ پاکستانی لشکر مند آن سمیر بلوچ ولد ناصر، وسیم بلوچ ولد ستار، سغیر بلوچ ولد سوال محمد و ظہیر بلوچ ولد سوال محمد ءِ دزگیر کننگ آن پد بیگواہ کرینے۔ کاروائی تا وخت پاکستانی لشکر اُراتا قیمتی آ گڑاتے ہم دُزانے۔
ایلو نیمہ غا کیچ ئنا ہند تمپ آن زوراکی ئٹ بیگواہ کننگوک آ بلال ولد حنیف نا جون خننگانے ہرا تمپ کوہاڈ نا ہندی ئسے۔
حوال تا رد ئٹ پن کروکا ورناءِ چار دے مُست پاکستانی لشکر پین مُسہ ورنا تیتون کوہاڈ آن زوراکی ئٹ بیگواہ کریسُر، ہرانا جون اینو ہوشک آباد آن خننگانے۔
یات مرے کہ بلال تون چار دے مُست مروان بلوچ، ثابت بلوچ و عدیل بلوچ ءِ ہم پاکستانی لشکر بیگواہ کریسس ہرافتیان عدیل بلوچ ولد عبدالقیوم نا جون داکان مُست سرنکن آن خننگاسس۔
