بی ایل ایف تینا پوسکُن جوڑ مروک نیاڑی تا بشخ کریمہ آرمڈ اسالٹ ڈویژن (کاڈ) ئنا جنگجو تا ہیلکاری نا ویڈیو ءِ تینا چینل آشوب آ شنک کرینے۔
ویڈیو نا بنداو ئٹی شہید بانک کریمہ نا ہمو تقریر اوار ءِ ہراٹی او گوریلا سرمچار آتا بابت ئٹ تران کیک۔ داڑان پد کاڈ ئنا سرمچار آک جتا سلہہ تا ہیلکاری، لاری و موٹر سائیکل تیا سواری کننگ آ خننگ مریرہ۔
کاڈ ئنا ہیلکاری کمانڈر ہیلکاری نا نیام ئٹ تران کرسا پائک کہ ہرا کسر ئے بانک کریمہ ننے آجوئی نا جنگ ئٹ نشان تِس، ہمو کسر ننا آجوئی نا ضامن ءِ، دا کسر ئے نن سدخئی و جہد ئٹ سوگو کننگ کینہ۔ بانک نا سدخئی ننکن ہمت و جوزہ ءِ۔
او مونا پائک کہ دا جہد ئنا خواست اسک کہ بلوچ چاگڑد مارانے کہ بلوچ زالبول آک جنگ ئنا پڑ آ تینا راجی جہد ئٹ تینا نرمزار آتا ہمراہ مننگ کیرہ، دا کاروان ئٹ نرینہ و نیاڑیک اوار ءُ۔ کاڈ ئنا جہدکار آک دا راستی آن سوگو ءُ کہ جنگ ئنا خواست آک تنیا سیاسی و جنگی سرسوبی اف، بلکن پدریچ کن چاہنداری ئسینا جوڑشت ءِ۔
اونا پاننگ ئس کہ کاڈ ئنا سرمچار آک بلوچ راجی آجوئی جنگ ئٹ اوار مروکا و دشمن نا برخلاف مزاحمت ئٹ بی ایل ایف تون اوار مسونو کہ ایلو بشخ آتا کمک ءِ آجوئی اسکان کننگ کیر۔
ہمر کہ کریمہ آرمڈ اسالٹ ڈویژن (کاڈ) نا سرمچار آک درو تربت نا خرک جوسک ئٹی سی پیک کسر آ سنگر ہلکور و زوراک آ پاکستانی لشکر ئنا ایکشن ٹاسک فورس ئنا کاروان آ جلہو کریر۔ دا ترند انگا جلہو نا بھرم ئٹی زوراک آ فوج ئنا بھاز آ کارندہ آک ہمو ہند آ کسکر و ٹپی مسر و اوفتا لاری تے نسخان مسک۔
دا بابت ئٹ ترجمان نا پاننگ ءِ کہ دا کاروائی کریمہ آرمڈ اسالٹ ڈویژن نا بنداوی جنگ ئنا گامگیج ءِ۔
