بلوچ نیشنل موومنٹ نا چیئرمین ڈاکٹر نسیم بلوچ تینا شنگ کروک درشان ئسیٹی یورپی یونین پاکستان و یورپی پارلیمنٹ نا باسک ریمنڈاس کاروبلیس نا منت ئے ہلکُنے و پارینے کہ او بلوچستان ئٹی بندغی حق آتا خلاف ورزی آ غور کرینے ۔
او پارینے کہ پاکستان بندغی حق آتا خلاف ورزی نا کُل سیمسر تے گدریفینے۔ یورپی یونین و ایلو جمہوری ڈیہہ آک تینا کاریم و مفاد کِن بندغی حق آتا خلاف ورزی ئے کپس۔ پاکستان ئے بندغی حق آتا خلاف ورزی آ الم جُست کننگ مرے۔
ڈاکٹر نسیم بلوچ پارینے کہ جہان ئے بلوچ، سندھی، پشتون و کشمیری مخلوق تون اوار مننگ خواہک اراکہ اسہ وڑ پاکستان لشکر و ڈکھوک ادارہ غاتا بےدادی تِہ مون تننگءُ و ہرافتا بندغ آتے زوراکی ئٹ بیگواہ کننگءُ۔
بلوچ نیشنل مومنٹ نا چیئرمین پارینے کہ سوراب ئٹی جیٹ آتا جلہو ئٹی، کماش و شاری تا خلنگ تون اوار مُچی نا سزا، غیر قانودی کوش، بندغ آتا زوراکی ئٹ بیگواہی و کسھفنگ نا تدینی تا پام ہیتر۔
او پارینے کہ یورپی یونین ئے داسہ گامگیج ہرفنگ خوائک پاکستان نا جی ایس پی پلس آ سنجیدگی ئٹ پٹ ئہ پول کننگ کیر۔ بندغی حق آتا خلاف ورزی تا ہم پٹ ئہ پول کننگ مرے، پاکستان ئے کاروبار ئٹی تننگ مروکا فائدہ آتے بندغی حق آتا حالیت ئے جوان کننگ کن کارمرز کے۔
ڈاکٹر نسیم بلوچ پارینے کہ جی ایس پی پلس پاکستان ئے بندغی حق آتا خلاف ورزی کن موکل تف۔
