بلوچستان نا بنجائی شار شال و مچھ ئٹ پاکستانی جیٹ طیارہ آک بال کننگ آ خننگ مسر۔
استو ننکان بولان مچھ ئٹ بھلو کچ ئسیٹی جلہو و دے درست برجاء سلوک تراک و سم کاری تا لڑ زرس سلینگ آن گڈ دوارہ بناء مس۔ و پاکستانی جیٹ طیارہ آک ہم بال کننگ آ خننگ مسر ۔
ہندی حوال تا رد ئٹ سہب ئنا سے وقفہ وقفہ ئٹ سم کاری نا توار بننگ ءِ، ہرا داسا ترندی ئٹ برجاء ءِ۔
حوال تروکا تا پاننگ ءِ کہ دا وختا تیبہ مچھ شار ئٹ سم کاری و تراک آتا توار بننگ ءِ، و ہندی مخلوق اُراتیٹ بند ءِ۔
یاتی مرے بلوچ لبریشن آرمی استو ننکان نو بجہ نا وختا مچھ ئٹ جلہو تا بناء کرے ہرادے ترجمان جیئند بلوچ اسہ بیان ئس شنگ کرسا پک کرے۔
