بی ایس او آزاد نا ترجمان شولان بلوچ تینا شنک کروک بیان ئٹ پارے کہ 28 اگست 2014 نا بیگہ نا آواران زیارت ڈن ئٹ ذگری تا عبادت کروک جاہ آ سلہہ بند بندغ آک جلہو کریر دا جلہو ئے پاکستانی ریاست نا سروکی ٹی کاریم کروکا ڈیتھ اسکواڈ و مذہبی شدت پسند آک کریسُر ۔
ترجمان پارے کہ اِرا موٹرسائیکل آ مروک سلہہ بند بندغ آک ذگری تا عبادت کروک جاہ آ سُمکاری کریسُر ہراٹی ہفت بندغ شہید مسونو ۔ شہید مروکا تیٹی بی ایس او آزاد نا مُسکوہی سیکریٹری جنرل شہید رضا جہانگیر نا باوہ بختیار ہم اوار اسک۔ کماش بختیار تون شش بندغ ہمو جاہ شہید مسر ۔
شولان بلوچ نا پاننگ ئے کہ جلہوکروک آتیٹ اسٹ نا چاہنداری پاکستانی ملٹری انٹیلی جنس نا کارندہ اسمان نا پن ئٹ مسس۔ جلہو آن گڈ سلہہ بند بندغ آک نرنگ ئٹ سر سہب مسر ، ہندی بندغ آتا رد ئٹ اوفک خُڑک ئنا پاکستانی لشکر ئنا کیمپ ئٹی پترینگاسُر ۔دا جلہو آن مُست آواران و کیچ ئنا جتا جتا ہند آتا ذگری تا خلیفنگ کن پمفلٹ بٹنگاسس۔ اوکان پد پن کروک آ ہند آتیٹی ذگری تے ٹک کننگ نا کیہی تدینی مونا بسس۔ دا کُل کاریمک بلوچ آجوئی جہد ئنا نزور کننگ کن مذہب نا پن ئٹ کننگاسُر۔
ترجمان پارے کہ پاکستانی ریاست بلوچستان آ کوزہ کننگ آن پد بلوچ راج ئے بشخ آتیٹی کننگ کن جتا جتا ہیلہ کاریم ئٹ ہیسونے ۔ ہرافتیٹی مذہبی شدت پسندی ہم اوار ئے ۔ پاکستانی ریاست مذہبی شدت پسندی ئٹ بلوچ چاگڑد ئے ونڈ کننگ نا کوشست کرینے ولے بلوچ راج ریاست نا کوشست آتے رد کرسا اوفتا مون آ سلیسونے۔
شولان بلوچ پارے کہ ای آواران ئٹی شہید مروکا کُل شہید آتے دروت ندر کیوہ ہرافتے ریاست بھلنی ٹی کاریم کروک آ شدت پسند آک ٹک کرینو ۔
