بلوچستان بار کونسل سوراب ئٹی لس آبادی آ مروکا بمب گواری ئٹی 27 لَس شاری تا شہید مننگ آ فریشانی نا درشان کریر و تدینی نا صاف پٹ ءَ پول و ذمہ وار آتا برخلاف قانودی کارروائی نا خواست کرینو۔
بلوچستان بار کونسل نا رد ئٹ سوراب شار و ہیب کھیب ئٹ بمب گواری نا سوب آن 27 بے گناہ شاریک شہید مسنو ہرافتیٹی بھلو کچ ئس معصوم انگا چناتا ءِ، معصوم شاری و خاص چُنابتا خلنگ اسہ بھلو دڑدی ءُ تدینی ئسے، بلوچستان بار کونسل دا تدینی آ سخت ڈُکھ و غم ئنا درشانی ئے کرسا خواست کرینے کہ دا تدینی ٹی غیر جانب دارانہ و صاف پٹ ءَ پول کننگ مرے تانکہ بمب گواری نا اصل راستی تے مونی ہتنگ مرے۔
بار کونسل تینا بیان ئٹی پارینے کہ پٹ ءَ پول ئٹی اگہ غیر قانودی گامگیج یا طاقت نا ناجائز طاقت نا کارمرز مسُنے گڑا ڈوہدار تے قانود نا رد ئٹ جوابدہ کننگ مرے و بندغی جان آتا رکھنگ ریاست و کُل ادارہ تا بنیاتی ذمہ واری ءِ، شاری و اُراتے نشانہ کننگ ہچ وڑ ئٹ قابل قبول اف۔
بیان ئٹی پاننگانے کہ سوراب ئٹی بے گناہ شاری تا خلنگ نا برخلاف و شہید آتا خاہوت آتون اواری نا درشانی ئے کرسا بلوچستان بار کونسل تیبہ بلوچستان ئٹی ہڑتال و عدالتی کاروائی تا بائیکاٹ نا فیصلہ کیک۔
بلوچستان بار کونسل حکومت آن خواست کرینے کہ زیمی مروکا خاہوت آتے زوت کُمک و مناسب معاوضہ تننگے، شاری تا رکھفنگ ئے یخینی جوڑ کننگ کن جوانو گامگیج ہرفنگ مرے۔
